थारू लेखक संघ नेपाल २०७७ सालमे स्थापना करल इ पुरस्कारके राशी ६० हजार रुप्या बा । उहाँहे इ पुरस्कार माघ १५ से १७ गटेसम पटेर्वा सुगौली गाउँपालिका–२, बेलवा पर्सामे हुइटि रहल १०वा थारू साहित्य राष्ट्रिय सम्मेलनमे पुरस्कार डे जैना संघके सचिव अनिल कुश्मी जनैलाँ । 

जितपुर सिमरा उपमहानगरपालिका–५, बकुलिया भवानीपुरके लेखक हृदयनारायणके २०३२ सालमे प्रकासिट कहली, सुनली, बुझली  थारु भासक् पहिला खिस्सासंग्रह हो । ओस्टक उहाँक् ललित बिस्तर (२०६८) थारु भासम् पहिला महाकाव्य अनुवाद हो कलेसे बन्हन (२०७१) थारु भासक् पहिला मौलिक महाकाव्य हो । इ बाहेक उहाँक् मेहमान (२०४५, डोसर संस्करणः २०७०) कविता संग्रह, थारु व्याकरण (२०४६), थारु जाति और समय (२०४८) निवन्ध संग्रह, चतुरंगी फूल (२०५६), कविता संग्रह। थारु संस्कार एक परिचय (२०५८), अभियान (२०५९) नाटक संग्रह, प्रभात रोशनी (२०५९) लघुखण्ड काव्य निक्रल बटिन । साठीके दशकसे कुछ सम्ठाइल उहाँ असीके दशकसे फे पोस्टा निकारे भिंरल बटाँ । इहे क्रममे खोजखबर थारु भाषाके (२०८०) निवन्ध, थारु जाति आ समय  (२०८१) नाटक, दुलदुल घोडा (२०८१) बालकविता संग्रह ओ पेहानी (२०८२) थारु भासामे पद्य सवाल जवाफ प्रकासिट बटिन ।

ओस्टक २०८२ सालके थारु महिला प्रतिभा सशक्तिकरण पुरस्कारसे लम्कीचुहा नगरपालिका कैलालीके गायिका समीक्षा चौधरी पुरस्कृत हुउइया बटि । इ पुरस्कारके राशी ३० हजार रुप्या बा । 

रोदन मेडिकल धनगढीके सञ्चालक चन्द्रसिंह चौधरी आपन दिवंगत गोसिन्या प्रतिभा चौधरीके पहिलो वार्सिक पुन्य तिथिके अवसरमा २०७९ सालमे इ पुरस्कार स्थापना कर्लक हुइट । कोरोनाके कारन २०७८ सालमे उहाँक् गोसिन्या प्रतिभा चौधरी बटिल रहि ।

थारु लेखक संघके पहिलक् अध्यक्ष सीताराम चौधरीके संयोजकत्वमा पुरस्कार छनौट समिति गठन हुइल रहे । उ समितिके सदस्यमे मोहन चौधरी, मनमति बखरिया, सुवेश कठरिया ओ सदस्य सचिवमे अनिल कुश्मी रहिट । 

थारु लेखक संघके केन्द्रीय अध्यक्ष डा कृष्णराज सर्वहारी कहलाँ, ‘२०७७ सालमे स्थापना करल थारु साहित्य पुरस्कार सुरुके बरस आख्यानकार शेखर दहितहे डेहेबेर यकर रकम ११ हजार १ सय ११ रहे । इ बरस ६० हजार हो सेकल । इ पुरस्कारहे थारु साहित्यके सबसे भारि पुरस्कार बनैना योजना बा ।’ ओस्टक उहाँ इहे माघ १५ से १७ गटेसम पटेर्वा सुगौली गाउँपालिका–२, बेलवा पर्सामे हुइटि रहल १०वा थारू साहित्य राष्ट्रिय सम्मेलनमे सब थारु स्रस्टन आइक अर्जि कर्ले बटाँ ।