-सञ्जय सुमन 

म फर्किन चाहन्छु 
विगतमा -
वा विगतभन्दा पनि सुदूर विगतमा 
अर्थात, म जन्मिन चाहन्छु 
कुनै दलित आमाको कोखबाट ।।

इतिहासले पहिलो अक्षर कोरेपछि 
जातको पहिलो धर्सो कोरिएपछि 
उक्त बाँझो चेतनशून्य समयको गर्भमा 
म जन्मिन चाहन्छु 
म जन्मिन चाहन्छु 
कुनै दलित आमाको कोखबाट ।।

बर्सौँदेखि वायुको सूक्ष्म अणुले सिर्जित प्राण
जलको बुँदले सिञ्चित देह 
र, भूगोलले जोडिएका पैताला 
रगतामयगरी चिरिए 
न मैले छोएँ उनलाई
न उनले छुने हिम्मत गरिन् 
हो, उसैको कोखबाट म जन्मिन चाहन्छु 
म जन्मिन चाहन्छु 
कुनै दलित आमाको कोखबाट ।।

गाउँको कुनै भोजमा 
ऊ आफ्नै लोटा
आफ्नै थाली लिइ 
अलग्गै बस्थिन् 
थालीको डिलमा कोरिएको जात 
भातभन्दा पहिले पस्किएको छुवाछुत
पानीको मुहानमा लगाइएको जातको ताल्चा 
फुटाल्नु छ 
हो, म जन्मिन चाहन्छु 
कुनै दलित आमाको कोखबाट ।।

सर्लाही, हालः काठमाडौं