मस्टरान् काकु अपन गोसिन्न्यइँ कठैं, “अरे आज गाउँसे डाइ भेंट करे आइटु कहटा, अट्रा ढेउर दिन हो गिल खोबसे नटियइ डेख्नास लागठ, टोहनके गाउँ नै अइलक् फेंन साल पुगे लागल कहटा ।”

“खै ! का करे अइटिन यि बुह्रिया फेंन यहाँ बिना कामक्, मै टे कलुवा ओलुवा पकुइया नै हुँ, साँझके फेंन संघरियक् वहाँ पार्टिमे जैना बा, अइहि टे यहे उब्रल टुब्रल खा लिहिं ।”  हुँकार गोसिन्या बोल्ठिन् ।

मस्टरान् बुडि घर पुगट सम हुँकार पटुहिया अफिस ओ नटिया शिशु स्याहार केन्द्रमे गइ गिल रहिन । 

डाइ पुग्लिन टे काकु फेंन अपन अफिस ओर सोझ्रटि कलै– “डाइ ! एकचुटि बँचल भात हुइ, ओहे खालिस । ओ टिभि लगा डेहटुँ, डिनके टिभि हेर्के बैठल रहिस । भुँख लागि टे भन्सम कुछ पकाके खा लिस, आझ टोर ओजेसे मोर अफिस फेंन ढिल हो गिल ।”

३ डिन हो गिल रठिन्, बुडि डिनभर घरे एक्केल्हि रठि । अपन लग अप्निहि पकैठि, अप्निहि खैठि । छावा पटुहियइसे एकघचिक फेंन बैठ्के मजासे बटवाइ नै पैले रठि । ना टे सँगे एक पाह्र कलुवा बेरि खाइ पैले रठि । कबु छावा पटुहिया बिहान्नि नटियइ लेले अफिस चल्जिठिन्, कबु साँहि जुन पार्टि खाके आइल बटि कठिन् । 

लगभग ३ बरसके नटिया डिनभर स्याहार केन्द्रमे रलक घरे अइठिन् टे बुडिसे एक्के घचिक किल खेल्के निंडा जिठिन् । जग्ठिन टे टिभि हेरे लग्ठिन । ओहे मारे बुडि अपन नटियइसे फेंन हौसभर खेले ओ बट्वाइ नै पैठि । 

टिसर रात बुडि सुट्ठि टे हुँकार एक्को निंड नइ पर्ठिन् । एहोंर ओहोंर सम्झट सम्झट आँखिभर झलरमलर आँस आ जिठिन् । ओहे बेला भिटम टाँगल बर्का घडि ११ बजल संकेट डेहठ । बुडि विचार टे नइ कै पैठि कि कट्रा बजल । मने घडिक् घन्टि सुन्के मने मने कठि, “यि जट्रा भारि बोल्नाहा घडि बा, ओट्रे ज्यादा ट्याम डेहट टे काहे नै । मोर छावा पटुहियन् ठे टनिक ढेउर ट्याम रटिन्, टब महिनसे अपन डुखना सुखना बटवइटै । ओ, एकओक छाक सँगे कलुवा बेरि टे खैटैं ।” 
....
 बुडि डोसर बिहानि गाउँ चल्गिलि ।

हालः धनगढी, कैलाली
                                                                   
स्केचः एआइ