आदिवासी जनजातिहरुको मानव अधिकारसम्बन्धि वकिल समुह (लाहुर्निप) र थाकस कैलारी गाउँपालिकाद्वारा बुधबार वैशाख १२ गते आयोजित एक छलफल कार्यक्रममा बोल्दै अध्यक्ष चौधरीले उक्त प्रतिबद्धता गरेका हुन् । 

भलमन्सा अर्थात् थारु गाउँका बरघरहरुलाई सक्रिय र सशक्त बनाउन उनीहरुलाई आवश्यक पर्ने पुस्तक तयारीको लागि छलफल डाकिएको थियो । छलफलमा भलमन्सा प्रणाली के हो ? लोकतान्त्रिक भलमन्सा प्रणालीलाई जोगाउन किन आवश्यक छ ? यसलाई सक्रिय र सशक्त बनाउन लाहुर्निप, थाकस र पालिकाको भूमिका किन जरुरी छ ? उनीहरुका लागि कस्तो पुस्तकको आवश्यकता छ ? आदि बिषयमा छलफल भएको थियो । 

छलफलको अन्त्यमा पालिका अध्यक्ष चौधरीले लाहुर्निपले उठान गरेको राम्रो सवालको सम्बोधनमा स्थानीय सरकार पछि नहट्ने, नीतिगत निर्णय मात्रै होइन, पालिका तन मन धनले समेत सहयोग गर्ने प्रतिबद्धता जाहेर गरे । उनले भलमन्साहरुलाई आवश्यक हुने पुस्तक प्रकाशनको लागि पालिकाको पूर्ण सहयोग रहने बताए । 

सहभागीहरुले पुस्तकमा भलमन्साका कार्यवधि, कर्तव्य, दायित्वसमेत उल्लेख हुनुपर्ने सल्लाह दिएका थिए । छलफलमा कैलारी गाउँपालिकाका कानुनी सल्लाहकार अधिवक्ता जोहारीलाल चौधरी र लाहुर्निपका संस्थापक सदस्य सर्जुप्रसाद चौधरीले बिषयबस्तुको उठान गरेका थिए भने लाहुर्निपका कैलाली सहजकर्ता दिलबहादुर चौधरीले छलफलको उद्देश्यबारे प्रकाश पारेका थिए ।

कार्यक्रम थारु कल्याणकारिणी सभा कैलारीका सभापति अशोक चौधरीको सभापतित्वमा भएको थियो ।