तर, यसरी मन दुखाएर कति दिन बस्नु ? उनले शोकलाई शक्तिमा बद्ले । पत्रकारिता पृष्ठभूमिका उनले  आफूलाई सम्हाल्न स्वर्गीय छोरो पुष्कर रोकायाको दोस्रो वार्षिक स्मृतिमा एकै पटक ११ थान पुस्तक लेखन तथा प्रकाशन गरे ।

गएको एक वर्षदेखि काठमाडौंमा मुटुको उपचार गराइरहेका रोकायाले आफूलाई पीडाबाट हुने डिप्रेसनबाट बाहिर निस्कनका लागि पुस्तक लेख्न थाले । हुम्ला जिल्लाको शान्ति पत्रकारिता, प्राकृतिक, सांस्कृतिक, सामाजिक, लोक साहित्य तथा विकासका विविध आयामबारे लेखिएका खोजमूलक आलेखबाट आफ्नो जिल्लालाई चिन्न र चिनाउने कामका लागि सानो प्रयास भएको उनको भनाइ छ।

उनले छोराको नाममा पुष्कर फाउण्डेसन पनि खोलेका छन् । फाउण्डेसनको सहयोगार्थ कचहरी मिडिया हाउसले प्रकाशन गरेको यी पुस्तक हुम्ला पुस्तक संग्रह हालै स्वर्गीय पुष्कर रोकाया स्मृति विशेषका रूपमा प्रकाशन गरिएको छ। 

११ वटा पुस्तक संग्रहमा जुनकिरीको उज्यालो, गणतन्त्रमा हुम्ला, हुम्लाका मुख्य अन्न, हुम्लाका चाडपर्व, हुम्लाको पाइतो, नारा चंखेली, ओम मरुत्, कोभिड – १९ मा हुम्ला, हिउँ लोकसुसेली, अकमा हुम्ला, स्थलगत लिमी रहेका छन्। हुम्ला जान्न, बुझ्न र अध्ययन गर्न चाहनेहरूका लागि यी पुस्तक राम्रो स्रोत हो ।

पत्रकारितामा कर्णबहादुर रोकाया र साहित्यमा समर हुम्लीको नामले कलम चलाउने रोकाया पछिल्लो समय विशेष गरी ग्रामीण पत्रकारिता र आञ्चलिक साहित्यतर्फ सक्रिय हुँदै  छन्। नेपाल पत्रकार महासंघ हुम्लाको संस्थापक सदस्यका साथै सचिव हुँदै अध्यक्ष समेत भइसकेका छन्। पछिल्लो समय हुम्लामै प्रेस व्यवसायमा हात हालेका उनले प्रेस चलाउन भने सकेनन् ।