नागरिक उन्मुक्ति पार्टीबाट बर्दिया–१ मा प्रतिनिधि सभातर्फ प्रत्यक्षमा परशुराम चौधरी तथा समानुपातिकतर्फ दीपककुमार चौधरी तथा जोधनी थारुको उम्मेदवारी आधिकारिक भएको घोषणा गरिएको छ । 
‘के पार्टीबाट उम्मेदवारी घोषणा गर्ने क्रम थालनी गरिएको हो ?’ यस प्रश्नमा नागरिक उन्मुक्ति पार्टीकी केन्द्रीय अध्यक्ष रन्जिता श्रेष्ठ चौधरीले मंगलबार विहान ढकियाखबरसँग भनिन्, ‘म इटहरीको कार्यक्रम छु । खास निर्णय के भएको हो, थाहा भएन , पार्टी प्रवक्तालाई सम्पर्क राख्नुहोस् ।’
उता नागरिक उन्मुक्ति पार्टीका प्रवक्ता दामोदर पण्डितले नागरिक उन्मुक्तिबाट कसैको आधिकारिक उम्मेदवारी सिफारिस नगरिएको बताएका छन् । 
प्रवक्ता पण्डितले बर्दिया क्षेत्र नं १ को उम्मेदवारी भएको हल्ला आफूले सुनेको तर त्यो आधिकारिक नरहेको ढकियाखबरलाई बताए । ‘यहाँ साथीहरु आज नागरिक उन्मुक्ति पार्टीमा प्रवेश गरेर आजै उम्मेदवार भएको घोषणा गरिरहेका छन् । यस्तो बच्काना हर्कत पार्टीलाई सह्य हुन्न,’ प्रवक्ता पण्डितले भने, ‘समानुपातिकतर्फ मनोनयनको इच्छा राख्नु हुनेले कुन जिल्लामा कोसँग सम्पर्क राख्ने यसबारे पार्टीले आधिकारिक निर्णय गरेको छ । तर प्रत्यक्ष तर्फको उम्मेदवारीमा पार्टीलाई कुनै हतार छैन ।’
रिपोर्टस क्लब,  काठमाडौंमा भदौ १६ मा भएको पार्टी प्रवेश कार्यक्रममा बहालवाला सांसद रतन थापा, पूर्व सांसदद्वय कैया चौधरी र हिमाञ्चल भट्टराईसँगै पशुपति विकासका पूर्व सदस्य सचिव डा प्रदीप ढकाल पनि प्रवेश गरेका थिए । प्रवेश लगत्तै डा ढकालले ढकियाखबरसँगको कुराकानीमा आफू बर्दिया–१ मा प्रतिनिधि सभातर्फ प्रत्यक्षमा उम्मेदवार उठ्न तयार रहेको बताएका थिए । 
कैलाली र बर्दियामा प्रत्यक्षमा को को छन् चर्चामा ? 
रेशम चौधरीले जितेको कैलाली क्षेत्र नम्बर १ मा पार्टी अध्यक्ष रन्जिता श्रेष्ठ चौधरी प्रतिनिधि सभामा उम्मेदवारीको उद्घोष गरिसकेकी छिन् । १ नम्बर क्षेत्रबाट प्रदेश सभामा पार्टीका संगठन मन्त्री लक्ष्मणकिशोर थारु तथा तीर्थ बोहराको चर्चा छ । प्रदेश सभामा आफूले टिकट नपाए बागी उम्मेदवारी दिन सक्ने भनेर लक्ष्मणकिशोरले पार्टीलाई दवाव दिन थालेका छन् । 
त्यस्तै, कैलालीको २ नम्बर क्षेत्रबाट प्रतिनिधि सभामा उम्मेदवारीको लागि अरुण चौधरी तथा ३ नम्बर क्षेत्रमा नागरिक उन्मुक्ति पार्टीबाट प्रतिनिधि सभामा उम्मेदवारीको लागि गंगा डंगौराको नाम सुनिश्चित जस्तै छ । २ नम्बर क्षेत्रबाट प्रदेश सभामा रतन थापा र महेन्द्र उपाध्यायको तथा ३ नम्बर क्षेत्रबाट प्रदेश सभामा इन्दु थारुको चर्चा छ । 
४ नम्बर क्षेत्रमा हालै नेपाल समाजवादी पार्टीबाट  नागरिक उन्मुक्ति पार्टीमा प्रवेश गरेका राजाराम चौधरी आंकाक्षी छन् । उनी नेसपामा समाजवादी थारु संघको केन्द्रीय महासचिव थिए ।
उता टीकापुर घटनामा दोषी ठहर भई हाल अद्र्धभूमिगत रहेका लक्ष्मण थारू कैलाली–५ बाट संघीय चुनाव लड्ने उद्घोष गरिसकेका छन् । 
रेशम चौधरी आफू बर्दिया–२ बाट संघीय चुनाव लड्ने मनस्थिति बनाएका छन् । मनोनयनमा परे पनि, नपरे पनि कसलाई टिकट दिने, कसलाई नदिने यसको अन्तिम टुंगो रेशमले कारागारबाटै लगाउने छन् । अहिले उनलाई भेट्न जानेमध्ये आधा भन्दा बढीले चुनाव टिकटकै कुरा गरिरहेका छन् ।