चुपचाप–चुपचाप
करनिडिया राट
बस्, कहुँ कुक्कुर भुँकट्
कहुँ गिडार अवाइट्
कहुँ जोग्नि डिया बारट्
कहुँ कन्फोर चिँगैरन बोलट्
टे, कहुँ डट्टावन गुजरि बोलट्
इहिसे ढेउर कुछ पटा नै हो
टीकापुर निडाइल बा कि जागल बा ?
कबो–कबो इहे डग्गर हुइटि
हौका–बयाल, आँढि चलठ्
ओ घुघ्वाइठ्, रुखबरिखके पटिया हँगिया
जसिक मनैनके जियामे
निडाइल हिर्डक ढक्ढिउरा
समुन्डरके डुम्मा उठेहस
छल्कठ् डुम ! डुम !!
बस्, टब्बे टब्बे लागठ्
टीकापुर निडाइल बा कि जागल बा ?
जब–जब सावन भाडो लागठ्
लागठ्, मनैनके जिया–जियामे
सब–कुल सब सैलाफ !
मनो हेरो, उ सुडुर बस्टिमे
घर–घरमे राह लागल
जरहे भुवक घुरौरा लागट्
ओ भुवक भौगर सिठमारके सुटल
मनो, कोइ खिट्कोर टे हेरे !
डेख लेहो,
ठौंहिँ भौगरिक झर्सल मनुख डेँह 
टब पुँछ्यो
टीकापुर निडाइल बा कि जागल बा ?
डन्कल आगिक लहरमे
घोज्–घोज्, घोज्–घोज् रिझ्टि रहल रकट हेरो
किट्टाइल भालम साम लगाइट्
कुर्हार–टेंगारि हुलट्
हँसिया–मुँडार कचोटट्
ओ हाँठक सिँक्रि टुरक लग
झ्यालखाना भस्काइल लग
हैँचिक टाना बल लगाइटा
आब पुँछो 
टीकापुर निडाइल बा कि जागल बा ?
हेरो,
झुराइल बगिया फुलाइट्
बुजा लागल मुँह बोलट्
नुँकल–छप्कल मनै
कोचियक सागहस कपार उठाइट्
ओ बाँसक कर्लाहस कपार ठार्ह करट्
सुनसान, सुनसान घर–अँगनामे
सजना मैना, झाल–कस्टार, मृडङ–मडरा बजट्
परडेस भागल डाडु–भैया गाउँ लौटट्
सडभावमे हाँठमे मिलाइट्
ओ जियासे जिया भरट्
आब पुँछो
टीकापुर निडाइल बा कि जागल बा ?