लुम्बिनी प्रदेश ठाकुरद्वारा घर म्वार बर्दिया

पढ्ना व लिख्ना उमेर रह मै बन्नु कमैया

कापी व कलम् पक्रना हाँठम् पक्रनु हँसिया

सबजे बन्ल भारी मनैया मै सदा दुखिया -१

गरिबके कोखी जरम् लेहनु ना डेख्नु स्कुल

पौवा लगाक गैया चढइनु ना डेख्नु चप्पल

बाजे कमैया, बाबा कमैया डाइ म्वार बुक्रही

गरिब होख पढ नि पैनु यी म्वार जिन्दगी-२

छट्री ओहर्क हर मै जोट्ठुँ लुगलुग जार म

बर्खा म्वार कट्ठा बोराके झुलुवा फाटल भेग्वा म

गेजर्टी खेतुवा सजना मै गैठु पानीक आस म

ढिकट जिउ टाटुल पस्ना जब खस्ठा आँखि म-३

कन्ढम हर हाँठम फह्रुवा जैठुँ मै खेटुवा म

पानी लगाक चिर्ठु मै खेटुवा भात खैठुँ झोप्री म

डुपहर घाम मेरूवा बनैठुँ काछी मै कोरठुँ

बद्री मै हेर्टी सुर्ती बनइठु मेरूवा म बिसैठुँ-४

गैया चढइ्टी, छेग्री चढइ्टी हरचाली करठुँ

कैह्या हुइ चुक्ता मलिक्वक् ऋण मनम सोँचठुँ

ना डेख्नु किताब, ना डेख्नु कापी, ना डेख्नु कलम

जिन्दगी म्वार कसिन् अभागी फुटल करम-५

हालः काठमाडौं