हर मनै आपन कामह लिरौसी बनाईक लाग कुछ न कुछ उपाय खोज्ठ, सायद ओहआर्से संसारम ढ्यार अविष्कार हुइल हुई कठुँ । हम्र आपन कामह गुणात्मक, उत्पादनमुलक, व्यवसायीमुखी बनैना जरुरी बा, ओत्रकेल नाही, बल्कि हालीहाली उसर्ना, आर्थिक हिसाबसे मितव्यी फे । 

विज्ञान सत्य हो जेकर बेल्साईसे एक मुर्तरुप लिहठ कलसे प्रविधि बैज्ञानिक ढंगसे काम कर्ना पद्धति हो । ओस्टहक एआई (AI) प्रविधि हो, उदाहरणक लागि सिरी, एलेक्सा, च्याट जिपिट, गुगल लगायत और फे ढ्यार बा ।

अब्ब हम्र एआईके बहानम आपन मौलिकता, ठेट शब्द, उच्चारण ओ पहिचानके लाग माठलराई करटि, यी बाट अब्बसे उठल नै हो, हमार अग्रज मनै भाषा शुद्धताके लाग ढ्यार कोशिस कर्ल फलस्वरुप किउ थारु भाषक पत्रिका, पोस्टा, क्यासेट, फिलिम, गीत, निकर्ल ट किउ भाषिक जागरणम पुरुबसे पच्छिउसम गोरपासु कर्ल । ओइन्क योगदानके बारेम खोजीबोझी कर चहना मनैन थारु इतिहासके पन्ना बिल्टैना अर्जि बा ।

म्वर जिज्ञासा, हम्र प्रविधिह कसिक बेल्सना ?

हम्र सोँच्टी कि एआई मानव संबेदनशिलता नै बुझठ का यि जट्टिक हो ट ? उ मनैन अस सोँच नै सेकठ, बोल फट्कार नै अइठिस, गुणात्मक काम नैहुइस, ठेँट बोली फ्टकारसे बोल नैसेकठ ? यि बाटम सत्यता कम बा । हम्र जस्टक एआईह काम अर्हैबि (कोडिंग, डिकोडिंग) ओस्टक यि गुणस्तरीय काम करसेकी । जस्टकी, सेल्फ अवेर एआई (Self Aware AI) कलक ट मनैन्ह एमोसन, सेन्स फे बुझठ, मनैन्हक स्तरके इन्टेलिजेन्टके बाट करट यी शताब्दीके उच्चतम प्रविधि फे हो । ओस्टक थ्योरी अफ माइन्ड, लिमिटेड मेमोरी,सुपर इन्टेलिजेन्स लगायत ढ्यार एआई बा ओकर फरक फरक काम बाटस् । 

अप्न हुक्र सायद अफ्रिकिमुलके गायक एकोनह (AKON) मजासे जन्लहुइबि । एकोनके नाउ किउ नै सुन्ल हुइ कलसे हिन्दी फिलिम रावनम (Ra-One) विशाल ओ शेखरके म्यजिकम युआर माई छम्मक छल्लो (You are my chhammak chhallo) गीत गाइट सुनबेर उ फे एकआई हस सुनजाईठ । हिन्दी म्युजीसियन फे ट्रायल कर्ल ढ्यार सिखैल पाछ गीत मजा बनल ।

आब हमार परिबेशके बाट करि, अब्बे महेश कुचिलाके शब्द, संगीतमे एआइसे बनाइल मान लेनु साथी टुहार गीत  चर्चामे बा । थारु साहित्यकार, कलाकार, लेखक ढ्यार बाट टब्बु फे ओइ अभिन ठाउँ, अवसर, मौका नै पाइ सेकठुइट । महा दमदार गजल लिख्ना भैया बाबु बाट ओइनके गीत, गजल अभिन बाहिर आइ नै सेक्ठो  । सायद आब यिह एआई ओइन्क गजल गीत बनाक बाहर निकारठ कि ? जे अडियो, भोकल, एरेन्जर, स्टुडियोके दाम डिह नैसक्ठो ओइन्के लाग ट यि बर्वार मौका हो । आब यि मौका लेना कि नाई, आपन आपन मर्जि....

आब म्वर डर सुनी, हम्र सब काम एआई हुकनसे कराई लागब ट परजिवी बना डारी, हमार सक्कु सृजनशिलता, लौव अविष्कारके डगर साँक्किर हुइटि जाई, हमन ढुम्मर बनाडारी, जाँगरचोर बनाडारी कना सुर्टाभर बा । आब हम्र का कर्ना, प्रविधिके सहारा लेना कि आपन घुँट्ठी पस्ना घोट्ना ? 

यी अब्बक लौव बहसके विषय हो । आई अप्न फे आपन मुरीमाठ लराई । जय गुर्वावा ।