इहे चैत १३ से १५ गतेसम टीकापुरमे टीकापुर साहित्य महोत्सवके टिस्रा संस्करन हुइल । ‘साहित्यमार्फत् सामाजिक सद्भाव’ मुल नारा रहल अप्सरिक महोत्सव इ कारन खास रहे कि एक डिनके पुरा कार्यक्रम थारु साहित्य, संस्कृति विसेस रहे । ७ ठो सेसनमे करिब २ डर्जन बोलुइया थारु समुदायके रहिट । 

डोसर इ महोत्सवमे खास माहोल राम झुमर नौटंकि (नाटक)के विसेस प्रदर्शन गरमा गरम कर्ले रहे । इ नौटंकि महि बाल्य उमेरमे पुगाइल । 

२०७२ भदौ ७ ओ ८ गते थरुहट आन्दोलनके क्रममे टीकापुरमे हुइल घटनामे ७ प्रहरी ओ एक नाबालकके ज्यान गइल रहे । थारु समुदायके बहुट जनहनके घरेम आगजनि हुइल रहे । टीकापुर क्षेत्रमे कुछ बरस टे टरटिह्वार मन्ना फेन हेरा गिल रहे । अइसिनमे टीकापुर क्षेत्रमे रातके राम झुमर नौटंकिके प्रदर्शन अपनेमे सुहाना रहे । 

सांसदके शपथ खैनासे पहिले दाङदेउखरके माननीय सुरेन्द्र चौधरी थरुहट आन्दोलनके क्रममे टीकापुरमे हुइल घटनाके लाल आयोगके प्रतिवेदन सरकार बन्लक ३ मैन्हा भिट्टर सार्वजनिक कर्ना इ पंक्तिकारके बाटचिटमे बटैले रहिंट । अप्कि टीकापुर क्षेत्र छिर्नासे कुछ डिन पहिले सुरेन्द्र चौधरी कहलाँ, लाल आयोगके प्रतिवेदन हलि सार्वजनिक हुइ, फेन डोस्रे समाचार बना डेहे परल ।

इ पंक्ति लिखटसम संघीय संसदमे माननीय सुरेन्द्र चौधरीसे लेके करिश्मा कठरियासम, लुम्विनी प्रदेशमे प्रदेश सांसद राजकुमार सत्गौवासे लेके कृष्ण कुश्मा थारुसम लाल आयोगके प्रतिवेदन हलि सार्वजनिक हुइ परल कना आवाज गुन्जायमान करल सुनगइल । 

सुरेन्द्र चौधरीसे लेके करिश्मा कठरियासम स्वयम् सरकार सम्हारल पार्टी रास्वपाके माननीय हुइट । ओहेसे उहाँलोग संसदमे आवाज उठैनाके संगसंगे कोठे वार्तामे अपन मुँरिमे रहल नेतन्से हलिसे हलि बाट मिलाइक चाहि । 

लाल आयोगके प्रतिवेदन सरकार बन्लक ३ मैन्हा भिट्टर सार्वजनिक कर्ना उद्घोष सुरेन्द्र चौधरी करलपाछे थारु नागरिक समाज, धनगढीके अध्यक्ष दिलबहादुर चौधरीके प्रतिक्रिया रहे, ‘लाल आयोगके प्रतिवेदन सरकार गठन हुइल ३ मैन्हा भिट्टर जो सार्वजनिक कर्ना डेटलाइन हलि टे नाइ हुइल माननीयजी ?’ 

ओइसिन टे सांसद करिश्मा कठरिया अम्हिक्के गृहमन्त्री सुधन गुरुङहे भेटघाट करलपाछे गृहमन्त्री फेन लाल आयोगके प्रतिवेदन हलि सार्वजनिक कर्ना आश्वासन डेहल बटैले बटि । मने हलि कलक कहिया ? 

रास्वपाके माननीय हुइल बहुट जाने विगतमे नाउपामे आवद्ध रहल बटाँ । यदि लाल आयोगके प्रतिवेदन हलि सार्वजनिक कैजाइ, रेशम चौधरीलगायट जट्रा टे अभियोग लागल बटाँ, ओइने निर्दोष ठहरल बाट आइ कलेसे ओकर प्रत्यक्ष फाइदा अप्कि रास्वपा पाइ । 

मने सबसे बरा अहम् सवाल इ बा, का लाल आयोगके प्रतिवेदन सार्वजनिक हुइलपाछे टीकापुर घटना अपराधिक नाहि, राजनीतिक मुद्दाके ट्याग लग्वा पाइ ? का रेशम चौधरीलगायट उ घटनामे मुछगइल मनै अइना चुनावमे भाग लेहे पैंहि ? यदि टीकापुर घटना राजनीतिक मुद्दाके ट्याग लग्वा नैपाइ, रेशम चौधरीलगायट फेन डोस्रे चुनाव लरे नैपैहि कलेसे लाल आयोगके प्रतिवेदन सार्वजनिकके कौनो अर्थ नै रहि । आबक् लग टे इहे प्रश्न खास बा कि लाल आयोग प्रतिवेदन सार्वजनिक हुइना शुभ साइत कहिया ? साभारः पहुरा दैनिक