शङ्कर पढिरहन्थ्यो, लेखिरहन्थ्यो । किताबहरू छापिएका थिए । पत्रपत्रिकामा लेखरचना छापिन्थे । पाठकहरू उसलाई धेरै मन पराउँथे । उसले ठुलै पुरस्कार पायो ।

पाठकहरूले भने, "को होला यस्तो पुरस्कार पाउने लेखक ?" धेरैले चिनेका थिएनन् ।

"आफ्नै गाउँठाउँमा भएको लेखक नचिन्नू ? साह्रै भएन ।" केही पाठकले गुनासो गरे ।

सोधीखोजी सुरु भयो । लेखकको डेरामै पुगे । सामान्य जीवनशैली, छरपस्ट किताब, सानो टेबुल, भुइँमा बसेर लेखिरहेको व्यक्ति; सबै छक्क परे ।

कतिपयले भने, "उहाँ त बेलुकीतिर यही बाटो हिँड्नुहुन्छ ।" कतिले विश्वास गरेनन् । भित्ताभरि सम्मानपत्र रहेछन् ।

एक जनाले भन्यो, "यत्रो पुरस्कार पाउनुभो । जीवनस्तर अलिक उकास्नु पर्यो कविज्यू ।"

"मैले जीवनस्तरमा पुरस्कार पाएको हैन त, लेखनस्तरमा हो; त्यो अवश्य सुधार्नेछु ।" शङ्करले भन्यो ।

                                                                         पिण्डेश्वर क्याम्पस, धरान-१४, सुनसरी ।