बर्दियक् ठाकुरबाबा नगरपालिकाके नेउलापुर गाउँम इह चैत १९ गते  द्वन्द्व पीडित परिवारहुकन भेटघाट कर्ना क्रमम डगरिम नेङ्गटि रहुँ ।

बुह्राइल अन्हार, टाङ्ग भरुवा डुनुवर छिट्वा झुलाइल, आपन सुरम नेङ्टि रहल बुह्राइल पुर्खासे से मुटभ्यार हुइल ।

मै बोल्नु, ‘बुडु कहाँ से आइटि रु कहाँ जाइटि रु’ जवाफ म उहाँ कल ‘सिढ्रा बेच गैल रहुँ । घर जाइटु’ कल । 

अच्चम्मित हुइटि पुछ्नु । ‘कै बरस पुग्ली, का नाउँ ? गाउँ कहाँ हो ?’

उहाँ कल रगविर थारु नाउँ हो । टकिया गाउँ हो । ८० बरस पुग्गिनु ।’  

महिहन अच्चम्मित हुइटि डेख्क उहाँ कल, ‘महिहन सब जान अस्ट कठ । उमेर कठु ट झन अचम्म पर्ठ । बुह्राइल मनै घरहँ रना हो । बिसैना हो । घरमन कर्ना मनै पल हुँइहि जे कठ । महिहन ओसिन नि लागट । हाँठ पक्ख्रा चलटसम आपन लाग अपनेहे कर्ना हो ।

छिट्वा म टाँग भरुवा बोक्ख गाउँ गाउँ घुम्टि सिढ्रा ब्याच भिर्लक आठ बरस हुइल । डिनक २ हजार कमाही हुइट । हुइल कमाही बैंकम ढर्ठु । दुःख बेरामम ओ समस्याम काम लागठ । प्याटिम पट्ठरी परल रह । अप्रेशन ओ बिर्वा कराइ ब्याला डेढ लाख  लागल । कमाही कर्ल रहुँ ट, काम लागल काहुँ, रिन नि लागल, बुह्रागिनु कैख घर परल रटु ट कहाँ पइटु । लर्कापर्कन के आस कर परट । 

कोइ कर्ट कि नाही ? जाँगर चलटसम कर्ना हो । ओस्ट नि रना हो । मै ट मुक्त कमैया हुइटु । जवानी म जिम्डारनक लाग ढ्यार कैगिल । आब आपन लाग कर ब्याला झन जोस जाँगर आइट । लर्कापर्का आपन करट । मै फे स्याकटसम आपन लाग कर्ना हो कना मन कहट ।’

बुडु रगबिरके बाट सुन ब्याला भिट्टरसे मन फुह्वाइल । चार बीस उमेर काट्स्याकल टब फे जंग्रार ‘रगबिर बुडु’ के बाटले मनम बहुट्ट उर्जा आइल ।