तराईके गँझिन बन्वाँ,पख्वा फाँरके
बघ्वा, भल्वनसे लरके
पानीसे नि गल्ना,
फोर्लसे नि फुट्ना
बन्जर धर्ति हे चिरके 
सदिऔं से बैठ्टी आइल
आदिवासी भुमिपुत्र थारू हम्र ।

यिहक सक्कु माटिम
खेट्वा बन्वाँ पख्वाम
हमार पस्नाके गन्ध बा
हम्र माटीसंग बच्ठी
माटीसंग साँस फेर्ठी
माटिम अन्न उब्जाक
यि आपन जिन्गी गुजर्ठी

सिकलसेल मलेरियासे
डराइल जमानम्
हम्र थारू कबु नि डरैली
न कबु यि शिर झुकैली
न टो केक्रो धाकसे डरैली
न टो केक्रो बटाहा छिनके खैली
न टो किहनो हेप्ली(चेप्ली
का करे कि हम्र सोझ थारू हुई

झुम्रा, सखिया, मघौटा नाचम
हमार पहिचान बिल्गाइठ
हमार हरेक अँख्राम
हम्र थारूनक भासा जियट
हमार बोली भाषा बा ट
हमार पहिचान बा
टबमारे हम्र थारूनके
यि धर्तिम शान बा

हम्र थारूनक जमिन छिनगैल
बोले पैना आवाज डबागैल
नेङ्गना ग्वारम् जंजिर लगागैल
काम कर्ना हाँठ काट्गैल
टब फे थारु हम्र आपन
स्वाभिमान नै बेच्ली
संघर्षक आगीम जरके फे
झन जिउगर आगी बनके
आपन पहिचान बचैली

अब जागो सक्कु डाडु भैया
जागो किसान सक्कु कमैयाँ
गाउँ टोल बस्टी से
कोनिकाटर झोंप्री झोंप्रामनसे
अपन अधिकार मागेक लाग
हेरेटी गैल पहिचान बचाइक लाग
हम्र थारूनके अस्तित्व बचाइक लाग
सक्कु मुक्त कम्लहरियन जागो ।
सक्कु मुक्त कमैयन जागो ।।

जानकी–८, जबलपुर, कैलाली
सम्पर्क नम्बरः ९८६६४९८४४८