मै छोटु रन्हु टे
हमार घर खुब आइट होरि खेलुइया
गाउक व रानपरोसक लवन्डा लवन्डि
होरि ढुरर्हेरि ख्याल
गिट गैटि
सेम्रक ढ्वाटाँ फुल्गेरे फुल्गेर
उप्पर लागल टेँम्हरि,
भेरि बहन्ना घारिम 
बठन्याँवन हेरो बारि म
घन्टन घन्टन घन्टा बाज
ओसहेक मोर मन बाझ
पिप्रिक पोक्या झार्क
मै रुइठु डिया बार्क
अरि बठिन्या हुर कैइड्या...हुर कैइड्या
बसन्या मुर्गा अट्वम 
ढुरहेरि खेल्ना घट्वम
होरि होरि, आँख बिडोरि
अस्टे अस्टे टमाम मेरिक गिट
गइटि आइट्
महि फे खुब रहर लाग
हुकन्हेक सँग होरि खेल्ना ढुरर्हेरि खेल्ना
हमार घर दिदिहुक्रे रलह
हम्रे पाँच दिदी बहिन्या
मै सबसे छोटु डाइक दूध पोछ्नि छाइ
डुइठो दिदीन्के भ्वाँज हुइल रल्हिन
डुइठो दिदिन्के बाम्कि रहे भ्वाज कैना
डुइ दिदिन्के पाछ मोर पाल्या 
मै सबसे छोटु हुइलक मारे
महि सबजे मैया करट
बहुट् मैयाँ करट
भुन्टि भुन्टि कहँट
मै सक्कुन्क मैयाले पुलपुलाइल रहु
महि क्वारम लेलेख नाच टल्है
किउ गैना किउ नच्ना
किउ रंग अबिर घस्ना
मैफे नाचटहु दिदिहुक्रफे नाच टल्ह
खुब राहरंगि हुइटह
सन्झ्याफे हो स्याकल 
गाउँक लर्का लाहलुहुक घर घर आइ टल्है
हम्रे भर खेल्टि रहि
एकघचिक पाछ हुडहुड पुटपुट
होलि रे होलि... कटि 
एकहुल रानपरोसक लवन्डावँ अइल
रंग अबिर पिचकारि नेँन्ढ नेँन्ढ
दिदी हुकन रग्याट भिर्ल
 रंग अबिर घसक लाग
रगेट्टि रगेट्टि बराडुर सम पुगैल
अँन्ढार होगिल रह
साट आठ जहनके आघ
मोर दिदिक कुछ कर नि स्याकल
पापिन्हँक पाप मन रल्हिन
रगेट रगेट रंग अबिर घस्ना निहुँम
म्वार दिदिक इज्जट लुट्ल
हम्र दिदिह राटभर खोज्लि कहु फे नि भेट्लि
आढा राट टरग्यान रन्ल्हा खबर करल
गिरि डर्वाँ बेल्झुन्डिम रख्नाहान बठिन्या
गरझुलल बाट कैख
ना कटि दिदी गरझुल्क बिट्गिलि
उ डिनसे मोर मनमे मोर नजरमे
होरिके रंग अबिर व होरि खेल्ना
बरा डुखके बाट हुइल
हरेक बरस होरि,ढुरर्हेरि आइट टो
मै सम्झठु होरिक डिन 
गुमाइ परल आपन दिदिहे 
उ डिन होरि या ढुरर्हेरि
नै आइल रहट टो 
मोर दिदिक ओसिन घटना घट्ने नाइ रह
उहेक मार होरि या ढुरर्हेरि मोर लाग
अभिसाब बनल बा डुरघट्ना बनल बा
लाल पियर हरड्यार रंग अबिर डेख्नु कलसे 
महि आपन दिदिक याड आइट
ओ उह डिनके झलझलि सम्झना 
आँखिक आघ घुम लागट ।
घुम लागट ।।

                                                                                                                                                                                        कवि पुराक