पुस माघके जुर बयाल
ओहो ! कत्रा जार हुइल । 
फल्कहान छोट्कवक् छावा
डुनु हाँठ छातीम् 
मन्के चप्क्वाइल ।
मुक्त कमैया फल्कहान छोट्कवाहे 
छावाहे सुफ्लैना 
कौनो जवाफ नै रहिस । 
छावा बाबाहे जार हुइल 
सुनैलक अर्थ 
डंडुर झुल्वा माँगटा कना 
फल्कहान छोट्कवाहे 
मजासे पटा बटिस । 
मने का कर्ना 
ना टे ओकर कौनो खेतवारी 
ना टे कौनो ठेक्का बटिस 
कहाइके मतलव ऊ 
वेकम्मा बा । 
छावक् जारसँगे ओकर फेन जार बह्रलिस  
ऊ कौह्रा टापे छिमेकीक् 
खेरन्ह्वाओर नेंगल । 
पिठ खोलल्  झुक्काहस् 
अन्य छाँहि फेन 
आगि टप्टि रहिट । 
भेभवा, सुख्ला, मंगलवा, पण्डवा 
ओकर मुक्त कमैया संघरियन् 
मानो ओइने आँखिक् शानले
बट्वइटि बटाँ । 
का करी 
अढिया खेती कसिक लगैना हो
जिमडरवा छाइ कमलह्रिया माँगठ 
ना लगाउँ पेट रोटी माँगठ 
यी उपरी जार टे 
दिन उचियाइटसम कम हो जाई
मने पेट भित्तरके जार 
इहि कैसिक डंडुर बनैना  
फल्कहान छोट्कवक् ठेन 
यकर कौनो जवाफ नै हुइस । 
डोसर ढम्मरढुस छाँहि 
एक्फाले हाँठ बह्राइठ ओ खोखठ् 
“फेन कमैयाँ बैठ्लेसे हो गैल झे ।”
फल्कहान छोट्कवक पैला 
हेर्टि हेर्टि ओहे छाँहीक्सँगे 
हेरा जाइठ ।