हुक्र मुअल इतिहास बेँच्क
सिंहदरबार छिर्ठ
टुँ फे हुकनक बाटम् भुल्ठो
कमैया मुक्त घोषणा के करल ?
बुर्हाइल मनैन भत्ता के डिहाइल रु
मलिक्वन्हँक बेगारि के कर छुटाइल ?
टुहाँर मनम्
म्वार मनम् बुडिक फोटु आइअस
झलल आइठ् एक्ठो फोटुँ
हमा बारिमक न झोङ्ल्यार
बुबक लगाइल 
बम्मइ आमक रुख्वा
बरघरान घरक डख्खिनसे
उठ्ठि रहल 
लल्छार डिन
कम्ड ठेरिक सौँठ्यारि धान कट्ना
चोख्खुर रेँटिक हँस्या
ओ ठुँठ हँस्य कचोट्ना
बरनक उह ठोक्या
मै एक्ठो बाट पुछु
कैह्यासम टुहाँर मनम्
इह फोटु अउइया बा ?
एक्चो डिउर्हार कोन्टि जाऊ
पटाहा डेर्हिम हेरो
उहाँ डेख्बो बुडिक बिनल ढक्या
एक्चो भिट्टर जाऊ 
उहाँ डेख्बो चाउर ढरल
डाईक आनल भोजाहा ढक्या
एक्चो भौँका छोरो
उहाँ डेख्बो भौँक छ्वापल
आजिक बिनल पन्ह्वाँ ढक्या
एक्चो बगर्वम जाऊ 
बुसि ढरल डेख्बो
काकिक बिनल ढक्या
टुहाँर 
आजिक
बुडिक
डाईक
काकिक
बिनल ढक्यम्
टुहाँर नाट पाटन्के पस्ना बहल बा
आप टुहाँर डुख ढक्या बोकि
टुहिन सुख ढक्या डि
उहमार मंसिर म 
धान ओसाए जाइबेर
टुँ ढक्या बोक्क जिहो....।