थारु कल्याणकारिणी सभा बारा जिल्ला समितिसे कुँवार ३० गते कइ गइल सोहरैया ओ छठके अवसरमे शुभकामना लेना डेना कार्यक्रममे नेपाल प्रज्ञा प्रतिष्ठानके प्राज्ञ सभासदस्य डा कृष्णराज सर्वहारी पोस्टाके घुर्घुट खोल्लाँ ।

बकुलिया क्याम्पसमे हुइल कार्यक्रममे पोस्टाके घुर्घुट खोल्टि डा सर्वहारी कहलाँ, ‘थारु भासामे पहिला खिस्सा संग्रह, पहिल महाकाव्यके रचियता महाकवि हृदयनारायणसे बारा जिल्लावासी किल नाइ देश भरके थारु स्रस्टालोग सिख्खा लेहे पर्ना बा ।’ पेहानीमे कवितात्मक शैलीमे सवाल जवाफ रहठ, इ अन्सार टे बारा, पर्सा क्षेत्रके सब थारु कवि हुइक चाहि । विडम्वना लावा पुस्ता थारु भासा, साहित्य सँवरनामे नइ लागल डेख्के बहुट दुःख लागल उहाँ आगे कहलाँ । उहाँ थारु लेखक संघके अध्यक्षके नाताले अइना २०८२ माघके डोसर अठवार पर्सा जिल्लाके सुगौली पटेर्वा गाउँपालिका, बेलवा गाउँमे हुइटि रहल १०वाँ थारु साहित्य राष्ट्रिय सम्मेलनमे सहभागी हुइक सक्हुन नेंउटा डेलाँ ।

पोस्टाके सर्जक हृदय नारायण चौधरी अपन जिन्गी थारु भासा, साहित्य सेवामे बिटल कहटि अपन भासाके उन्नतिमे समुदाय अपनेहे लागे पर्ना धारणा रख्लाँ । बारा जिल्लामे थारु भासाहे जबसम पठनपाठन कराइ नइ सेक्जाइ, टबसम अपन मनहे सन्तोष लेना ठाउँ नइ रहल कहटि सबजाने थारु पोस्टा लागु करइनामे लागे पर्ना बटैलाँ । थारु कल्याणकारिणी सभाके केन्द्रिय उपाध्यक्ष रहल उहाँ आगे कहलाँ, पोस्टा पह्रके पाठकलोग ज्ञान हासिल करिंट कहिके अपन सबहस पोस्टा निशुःल्क डेटि बटुँ । न कोइ प्रतिक्रिया डेहे, न लावा रचना करे । नयाँ स्रस्टा जन्माइ नाइ सेक्के बहुट दुःख लागठ ।’

कार्यक्रममे राष्ट्रिय थारु कलाकार मञ्चके जिल्ला अध्यक्ष जयप्रकाश चौधरी, मञ्चके मधेस प्रदेश अध्यक्ष भुवन चौधरी, थाकस नगर सभापति राजेन्द्र चौधरी, पर्साके कवि मोहनदास थारु लगायत शुभकामना डेले रहिट । 

थाकस बारा जिल्ला सभापति रामप्रसाद चौधरीके घरगोस्याइमे हुइल शुभकामना लेना डेना कार्यक्रममे जिल्ला उपसभापति लक्ष्मीकान्त चौधरीसे स्वागत, सचिव यादवकृष्ण चौधरीसे कार्यक्रम सन्चालन कइ गइल रहे । कार्यक्रमके बिच बिचमे प्रमोद चौधरीके टोली, श्याम चौधरी, श्रीदेवी चौधरी, महिमा चौधरी लगायतसे मेरमेरिक गीत, नाच प्रस्तुत कइ गइल रहे ।