थारु भासाके लावा डग्गर त्रैमासिक आपन १६औं बार्षिकोत्सव सँगसँगे थारु साहित्य–संस्कृति प्रतिष्ठानके टिस्रा बार्षिकोत्सव निम्जा गइल बा । ओस्टक, साहित्यकार शत्रुघन चौधरीहे लावा डग्गर साहित्य पुरस्कार फेन डे गइल बा । लेखकलोगन हौसला बह्रैना लावा डग्गरके अभियान हो ।  

लावा डग्गर पत्रिका किल नाहि देश भरके आउर पत्रपत्रिकाके फेन बिक्री बिटरन समस्या बा । बहुटसे पत्रपत्रिका देश विदेशमे पाठक जोरक लग अनलाइन फेन चलइले बटाँ । उहे सिलसिलामे लावा डग्गर साहित्यिक त्रैमासिकहे अनलाइन संस्करनमे फेन लान गइलक हो । 

लावा डग्गर साहित्यिक त्रैमासिक प्रेस काउन्सिलके क वर्गमे परल बा । नियमित ओ क वर्गमे परल इ नेपाल भरके अकेलि थारु भासक् साहित्यिक पत्रिका हो कहेबेर हम्रहिन गर्व लागठ । थारु साहित्यकारबाहेक गैरथारु साहित्यकार फेन जइसिक लावा डग्गर पत्रिकाहे रचना डेके सहयोग करलाँ, विज्ञापन डेके हम्रहिन आगे बहै्रलाँ, ओस्टक इ अनलाइन संस्करनहे साथ डिंहि कना हम्रे अस्रा कर्ले बटि । 

हालके लग डिनके एक रुप्यक् दरले इ अनलाइनके वार्षिक सेवा शुल्क तीन सय पैंसट्ठी रुप्या टोक गइल बा । अपनेनके हम्रहिन डिनक् एक रुप्या सहयोग डि, हम्रे कम्टिमे डिनक् एकठो लावा रचना खौंक्बि । इ बाहेक टरटिउहार अन्सारके विज्ञापन डेके फेन हमार हौसला आगे बह्रा डेबि कना अर्जि करटि । 

थारु भासा, साहित्य जोेगैनामे लावा डग्गर पत्रिकाके बरवार योगदान रहल ढारना यकर बार्षिकोत्सवमे आइल सबहस पहुनन्के कहाइ रहे । इहिसे हमार हौसला बह्रल बा ।

समयअनुसार थारु समुदाय फेन परिवर्तन हुइटि बा । इ अनलाइन हम्रे जस्टक बोल्ठि, ओस्टक लिखि कना बाटहे अनुसरन कर्टि आगे आइल बा । थारु साहित्यमे रुचि रहल संसारभर छिटकल सुभेच्छुकलोगन इ अनलाइन जोरना ढुपौरा बनि । ओकर साथसाथे जेएनजी पुस्ताहे थारु साहित्यमार्फत् थारु भासा लिखक कुछ ना कुछ जरुर हुरचुल्लि लगाइ कना हमार अस्रा बा । आइ, थारु साहित्यहे सबजे मिल्के बह्राइ, पौंह्राइ ।