बर्दियाके बारबर्दिया नगरपालिका–१० म रलक मेरैया गाउँ आब सखिया नाच क रौनकताले भरल बा । सन्झ्याकन गाउँक सक्कु बठन्यावन एक्क मेरक मौलिक वेशभुषा लगाक मन्ड्रा ओ मजैराक तालम गाउँक मुल बरघर चौधरी प्रसाद चौधरीक् अंग्नम् नच्ठ । 
मोरिन्या रोशनी चौधरी ‘किरण’ ओ पज्गिन्या प्रीति चौधरीक् अगुवाइम नाच हुइटि बा ।

गाउँम सखिया नाच नचुइया बठन्यावन पल पल फे मन्ड्रा बजैना मडरिया नि पैठि कैकन सखिया नाच नचुइया बठन्यावन गुनासो कर्लक ओरसे सक्कु मेरैया गाउँबासी सल्लाह कैखन मन्ड्रा बजाइक लाग प्रत्येक डिन सात सात घरक पाला लगाइल बा ।

पहिल एक महिनासम्म नच्ना सखिया नाच आजकाल एक्क अठवार सम्म केल नाच जाइठ । गाउँमक नच्ना उमेरक बठन्यावन पह्राइक सिलसिलम बाहेर जैना ओ आबक लौव पुस्ता सख्या नाच नाचक लाग अग्रसर नि हुइलक ओरसे  सख्या नाचक मौलिकता हेरैटि गैलक अवस्था बा । 

बारबर्दिया नगरपालिका भिट्टर बहुट कम गाउँम नाचजैना सख्या नाच हँ नगरपालिका ओ वडा समयम संरक्षण करक लाग चासो नै डि कलसे आबक कुछ वरस पाछ सखिया नाच हेरइना ढिउर सम्भावना बा ।