बुधबार प्रधानमन्त्री पुष्पकमल दाहालसँगको भेटवार्तामा सुदूरपश्चिम सरकारमा जाने सहमति भएको नागरिक उन्मुक्ति पार्टीका संरक्षक रेशमलाल चौधरी जानकारी दिएका छन् । 

सुदूरपश्चिम सरकारमा यस अधि नै नागरिक उन्मुक्तिलाई समेट्ने प्रयास भएको थियो । तर, आफ्नो पार्टी सुदूरपश्चिममा निर्णायक भएपनि सम्मानजनक भाग नदिएको र यस पहिले गरिएको सहमतिमा इमान्दार नबनेको भन्दै नाउपा सरकार बाहिरै थियो । 

कमलबहादुर शाह नेतृत्वको सुदूरपश्चिम सरकारले एक मन्त्रालय मात्रै दिने बताएपछि नाउपा सुप सरकारमा सहभागी भएको छैन । अब भने प्रधानमन्त्रीले नै पूर्व सहमति अनुसार मन्त्रालय दिने प्रतिबद्धता जनाएका छन् । असारको पहिलो साता काँग्रेसका प्रदेश मन्त्री पृथ्वीबहादुर सिंहको सडक दुर्घटनामा निधन भएपछि उनले सम्हालेको आन्तरिक मामिला तथा कानून मन्त्रालय बाँकी छ । त्यस्तै, भूमिसुधार मन्त्रालय पनि बाँकी नै छ । नाउपाको यी दुबै मन्त्रालयमा दावी रहेको छ ।