युवा तथा खेलकुद मन्त्रालयले उहाँलाई आर्थिक वर्ष २०७९÷८० मा प्रदान गरिने राष्ट्रिय युवा प्रतिभा सम्मानका लागि वातावरण संरक्षण क्षेत्रबाट छनोट गरेको हो । भजनी नगरपालिका –६ निवासी डङ्गौरा बाल्यकालदेखि वन, वातावरण, वन्यजन्तु तथा चरा संरक्षणमा क्रियाशील रहेका छन् ।
जीवनको पूरै समय संरक्षणमा बितिरहेको उनले बताए । सम्मानका लागि नेपाल सरकारले आफूलाई छनोट गरेकोमा उहाँले खुसी व्यक्त गरे । उनले नेपाल पन्छी संरक्षण सङ्घ (बीसीएन) मा चरा विज्ञको रूपमा कार्यरत रहेका छन् ।
डङ्गौराले सुदूरपश्चिम प्रदेशमा दुर्लभ गिद्ध, खरमजुर, सुनौलो तोप चराको हरेक वर्ष अनुगमन गर्दै आएका छन् । यसैगरी, नेपालको प्रथम चरा आरक्ष घोडाघोडी चरा अभय आरण्य क्षेत्र, बसन्ता करीडोर र शुक्लाफाँटा राष्ट्रिय निकुञ्जको सिमसार क्षेत्रमा नियमित चरा अनुगमन तथा संरक्षणका लागि समुदायस्तरमा सचेतनामूलक कार्यक्रमसमेत गर्दै आएका छन् ।
स्कुल पढ्ने बेलादेखि डङ्गौरा कैलालीका संरक्षणकर्मी भोजराज श्रेष्ठ (गुलेली बाजे) सँगै गुलेली सङ्कलन अभियानमा संलग्न भएका थिए । डल्फिन संरक्षण क्षेत्रमासमेत अग्रणी भूमिका निर्वाह गर्दै आउनुभएका डङ्गौराले २०१० मा अब्राहम संरक्षण पुरस्कार र २०१२ मा वातावरण संरक्षण पुरस्कार प्राप्त गरेका छन् ।

यसैगरी युवा पत्रकारिता पुरस्कारका लागि मेनुका ढुंगाना तथा प्रकाश सिंह पनि छनोट भएका छन् ।