बर्दियाके ठाकुरबाबा नगरपालिकामे पहिल अन्तर्राष्ट्रिय थारु सम्मेलन शनिच्चरसे सुरु हुइल बा ।

थारु अन्तर्राष्ट्रिय महासभाके आयोजनामे नेपाल तथा भारतके थारु अगुवा, नेता तथा बुद्धिजीविहुकनके सहभागितामे ठाकुरबाबाके सिंहबाहीनी खैल मैदानमे प्रथम अन्तर्राष्ट्रिय थारु सम्मेलन हुइल हो ।

उदघाटन कार्यक्रमके प्रमुख अतिथि पुर्व शिक्षा राज्यमन्त्री तथा थारु नेता तेजुलाल चौधरीसे नेपाल भारतके थारुहुकनके पहिल नेपाल जमघट हुइल बटैलै । थारु समुदाय आघे बह्रेक लाग एकजुट हुई पर्ना बटैलै ।

कार्यक्रममे बोलुइया थारु समुदाय अभिनफे राज्यके टमान निकायमे पहुच पुगे नइसेकल अवस्था रहल ओरसे आर्थिक, सामाजिक तथा राजनीतिक क्षेत्रमे आघे बह्राइक लाग सक्कु थारु समुदाय एकजुट हुइना पर्ना आवश्यकता रहल बटैलै । अब्बेफे थारु समुदायसे राज्यसे अपेक्षा करल अनुसार न्यायोचित स्थान ओ अवसरसे वञ्चित हुइटी रहल अवस्था ओरसे थारु समुदाय एकमत हुके थारु संगठनहे बल्गर बनैनाके कौनो विकल्प नइरहल बटैलै ।

नेपालमे थारु समुदायके लाखौके संख्यामे बसोबास रहलेसेफे राजनीतिक तथा प्रशासनिक क्षेत्र न्युन सहभागिता रहल ओरसे थारु समुदायके राज्यसत्ता संचालनमे पुगे नइसेकल अवस्था औल्यइलै ।

नेपालमे अभिनफे तराई क्षेत्रमे थारु समुदायके बाहुल्यता रहलेसेफे स्थानीय तहमेफे बल्गर उपस्थिति हुई नइसेकल हो । यी मध्य झन् थारु महिला झन पाछे रहल कार्यक्रममे बोल्न महिलाके कहाई रहे । नेपालमे थारु महिला नगरप्रमुखमे दुई जाने केल रहल बा । महिलाहुकनहे राजनीतिक दलसे चुनावके बेलामे टिकटसम नइडेहल ओरसे यैसिन अवस्था सिर्जना हुइल सुरङगा नगरपालिकाके नगरप्रमुख गीता चौधरी बटैली । महिलाहुकनहे टमान क्षेत्रमे पाछे पारल बटैली । कार्यक्रममे बोलुइया बक्ता सक्कु जे थारु संगठनहे बल्गर बनैनाके विकल्प नइरहल बटैलै ।

कार्यक्रममे बारबर्दिया नगरपालिकाके नगरप्रमुख छबिलाल थारु कार्यक्रमके सफलताके शुभकामना डेटी थारुहुकनके सबसे पुरान संस्था थारु कल्याणकारिणी सभाहे समन्वय करल हुइलेसे आउर ब्यापक सहभागिता जुटाई सेक्ना सुझाव रख्लै । ठाकुरबाबा नगरपालिकाके नगरप्रमुख तिलकराम लम्साल अन्तराष्ट्रिय स्तरके प्रथम कार्यक्रम अपन पालिकामे धारके ठाकुरबाबा नगरपालिकाहे चिन्हैना सुनौलो अवसर प्राप्त करल बटैलै । कार्यक्रमहे अपने ओ पालिकाके ओरसे हरेक दृष्टिकोणसे सहयोग कैना तयार रहल बटैलै ।

सम्मेलनमे नेपाल तथा भारतमे बासोबास कैना थारु बुद्धिजीवि तथा थारु अगुवाहुकनके सहभागिता रहल बा । थारु समुदाय मिलके हम्रे ढेर पाई सेक्बी कना नाराके साथ ठाकुरबाबा नगरपालिका १ सिंहबाहिनी खेलमैलानमे सुरु हुइल सम्मेलनमे पहिल दिन उदघाटनके कार्यक्रम हुइल बा । दुसरा दिन थारु समुदायमे रहल टमान मेरिक सवालमे वृहत छलफल कैना कार्यक्रम रहल आयोजक जनैले बा ।

कार्यक्रमके उदघाटनमे कार्यक्रमके शुभकामना मन्तब्यसंगे थारु परम्परागत टमान मेरिक साँस्कृतिक प्रस्तुती तथा थारु राष्ट्रिय कलाकारहुक्रे अपन कलाप्रस्तुत करले बटै ।

थारु अन्र्तराष्ट्रिय महासभाके अध्यक्ष दीपप्रसाद नारायण थारुके सभापतित्वमे हुइल कार्यक्रममे भारत तथा नेपालके अगुवा नेता तथा बुद्धिजीविहुकनके सहभागिता रहल बा । अटवारके रोज थारु समुदायके सवालमे विविध छलफल करटी ठाकुरबाबा प्रथम अन्तराष्ट्रिय थारु सम्मेलन घोषणा पत्र जारी करटी सेक्ना आयोजक जनैले बा ।