शनिबार भैरहवामा आयोजना भएको पार्टी प्रवेशको सोही कार्यक्रममा चौधरीको पुस्तक बिमोचन भएको हो । नागरिक उन्मुक्ति पार्टीकी अध्यक्ष रन्जिता श्रेष्ठ र उनका पिता लालवीर चौधरीले पुस्तक विमोचन गरेका हुन् ।

त्यससँगै नागरिक उन्मुक्ति पार्टीको पार्टी प्रवेश कार्यक्रम सम्पन्न भएको छ । एलिजा गौतमसँगै राजेन्द्रवीर रायले पार्टी प्रवेश गरेका  छन् । शनिबार भैरहवामा आयोजित कार्यक्रममा पार्टी अध्यक्ष रञ्जिता श्रेष्ठले पार्टीमा प्रवेश गराएकी हुन् ।

पार्टी प्रवेश पछि एलिजा गौतमको सम्बोधन:

श्रद्धय अध्यक्ष श्री रञ्जिता श्रेष्ठज्यू, पार्टी पदाधिकारीज्यूहरु, आदरणीय जनसमूदायहरु, महिला, भद्र तथा सज्जन व्यक्तित्वहरु । यहाँहरु सबैलाई मेरो व्यक्तिगत तर्फबाट जुझारु अभिवादन छ। मैले आजकै मितिबाट यस गौरवशाली पार्टीमार्फत आफ्नो राजनीतिक जीवनको अध्याय सुरु गरेको छु । मलाई विश्वास गरेर यस पार्टीमा स्थान दिनुहुने श्रद्धय अध्यक्षज्यूप्रति आभारी छु । मेरो राजनीतिक प्रवेशले समाज र देशप्रतिको मेरो दायित्वबोध गराएको अनुभूति गरेको छु । म सेवाको भावले नै राजनीतिमा हाम फालेको हुँ । यसमा म आफूलाई खरो रुपमा प्रस्तुत गर्नेछु । भुईँमान्छेहरुका आवाजलाई बुलन्द बनाउनु हामी सबैको कर्तव्य हो । हाम्रो राजनीतिक सक्रियताले आवाजविहीनहरुको आवाज बोल्नेछ । हामी बेसहाराहरुको साहारा बन्नेछौं । जनताका हरेक अभाव पूर्ति गर्ने कुरामा हाम्रा पाइला चल्नेछन् । हामी हाम्रो पार्टीले बोकेको उद्देश्य पूरा नहोउञ्जेलसम्म अहोरात्र खटिईरहनेछौं ।

नागरिक उन्मुक्ति पार्टीले सामाजिक लोकतन्त्र र थारु अधिकार विचारधारा बोकेको छ । यसले स्थापनाको छोटो समयमा नै जनताको मन जितेको कुरा निर्वाचनमा यसले प्राप्त गरेको सफलताबाट नै पुष्टि भएको कुरा यहाँ मैले भनिरहनुपर्दैन् । यस पार्टीले सार्वजनिक गरेको आफ्नो उद्देश्यअनुरुप स्वेच्छाचारी राजनीतिक सोच तथा वातावरणले धमिलिएको नेपाली राजनीतिमा अनुशासन तथा नैतिक प्रतिबद्धताको धरालतको स्थापना गर्नु आजको आवश्यकत्ता हो ।

पार्टीले बोकेको मूल उद्देश्यबमोजिम दिशाहीन तथा गतिहीन नेतृत्वका गलत आकांक्षा तथा गलत अभिप्रायका कारण नेपाली समाज तथा सामाजिक मान्यताहरु बन्धक रहँदै आउनुपर्ने अवस्थाको अन्त्य गर्न जरुरी छ । अब नयाँ पुस्तालाई राजनीतिक क्रान्ति भन्दापनि आर्थिक क्रान्तिको जिम्मेवारी हस्तान्तरण गरी दीर्घकालिन पथमा नेपाली समाजको प्रतिनिधित्व गर्ने परिकल्पना यस पार्टीले गरेको छ । यस कुराले मेरो मन छोएको छ । यो दल रोज्नुको अर्को मुख्य कारण पनि यसले बोकेको यही उद्देश्य हो ।

मलाई देशका पूराना दलबाट पनि ती पार्टीमा प्रवेशको लागि प्रस्ताव आएका थिए । तर, म युवा भएको र यस पार्टीले बोकेको उद्देश्यबाट प्रभावित बनेकोले नै मैले यो दल रोजेको छु । आजबाट मेरो राजनीतिक यात्राको आरम्भ भएको छ । म यो राजनीतिक यात्राको क्रममा हजारौं पटक आफूलाई जनताको सेवाको अधिकतम परीक्षामा होम्याएर पास गराउन चाहन्छु । यो मेरो प्रण हो । अग्रजहरुको आर्शिवाद, सल्लाह र सुझाव अनि युवाहरुको नवीनतम सोच लिएर हामी यस पार्टीलाई अरु दलभन्दा फरक रुपमा उभ्याउने छौं । देश र जनताको जीवनस्तर उकास्ने दायित्वबोधका साथ हामी सबै सामूहिक भावनाले अघि बढ्ने छौं ।