थारु कल्याणकारिणी सभा दाङको आयोजनामा जिल्ला समन्वय समितिको प्राङगणमा हुन गइरहेको माघ महोत्सवको तयारीका लागि १२१ सदस्यीय तयारी कमिटि गठन गरिएको छ ।

 ‘आर्थिक जागरण ओ साँस्कृतिक रुपान्तरण हमार अभियान, सामाजिक न्याय सहितक समृद्धिम हमार योगदान’ भन्ने  नारासहित आयोजना हुन गइरहेको महोत्सवलाई भब्य र सभ्य बनाउनको लागि  अशोक चौधरीको संयोजकत्वमा १२१ सदस्यीय स्वंयसेवक परिचालन समिति गठन गरिएको हो । 
त्यस्तै स्वंयसेवक परिचालन समितिको सचिवालयमा लब्लिन क्यानभास, वीरेन्द्र चौधरी, जंग चौधरी र कल्पना चौधरी रहेका छन् । यसैगरी ११ वटा स्वंयसेवक परिचालन उपसमिति गठन गरिएको महोत्सव प्रचारप्रसार समितिका संयोजक सन्तोष दहितले बताए । 

उनका अनुसार वीरेन्द्र चौधरी, भीमबहादुर चौधरी, तिलक चौधरी, जंग चौधरी, शोभाराम चौधरी, श्रीनारायण चौधरी, कुलराज चौधरी, राजेश चौधरी, सुन्दर चौधरी, स्यानु चौधरी र मेघराज चौधरीलाई उपसमितिको संयोजकको जिम्मेवारी दिएको छ । 

थारु कल्याणकारिणी सभा दाङका अध्यक्ष भुवन चौधरीको अध्यक्षतामा भएको युवाहरुको भेलामा बोल्ने बक्ताहरुले  थारु समुदायको आर्थिक, सामाजिक, साँस्कृतिक र राजनीतिक अधिकारको सुनिश्चिताको लागि महोत्सवमार्फत् घोराहीमा थारु समुदायको सशक्त उपस्थिति देखाउनु पर्ने बताएका थिए । 
बैठकपछि महोत्सव स्थल जिल्ला समन्वय समितिको प्राङगण पनि सरसफाई गरिएको थियो । 

महोत्सवमा मघौटा, छोक्रा, हुर्डुङ्या लगायत ४ दर्जन भन्दा बढी नाच प्रस्तुतिका साथै थारु समुदायको परम्परागत हस्तकला, काष्ठकला, थारु भाषाको पुस्तक प्रर्दशनी, मौलिक खानाको परिकार रहने थाकस दाङका अध्यक्ष भुवन चौधरी जानकारी दिए ।