शपथ लिनु अघि नागरिक उन्मुक्ति पार्टीकी अध्यक्ष रन्जिता श्रेष्ठ चौधरीले नागरिक उन्मुक्ति पार्टीका संरक्षक रेशम चौधरीलाई डिल्लीबजार कारागारमा आर्शीवाद लिन गइन् । 

थारू पोशाकमा सजिएकी उनी सपथपछि आफूमा जिम्मेवारी बोध भएको बताइन् । आफूले न्यायको लागि आवाज उठाउने र न्यायको लागि लड्ने बताइन् । 
बाहिर हामीले जति बोले पनि कसैले सुनिदिदैन । सुने तापनि कसैले मनन गरिदिदैन तर यो ठाउँ भनेको आफ्नो नीति, कानुन भित्र रहेर बोलिएका आवाज सुनिनु पर्छ भनेर हामीले झक्झक्याउने हो । यो ठाउँबाट बोल्दा खेरि जति बुलन्द आवाज निस्किन्छ । निर्दोषहरुका लागि हामी न्याय मागिरहेका छौ । हामीले यो ठाउँबाट पनि यहि नै बोल्नेछौ । पक्कै पनि हाम्रो आवाज अब चाहिँ सुनिनेछ ।
उनले भनिन् ,रेशम चौधरी लगायत राजबन्दीहरुको रिहाइ छिट्टै नै हुनेछ । हामीले आशा लिएका छौ । नागरिक उन्मुक्ति पार्टीका संरक्षक, हाम्रा निर्दोष राज्बन्दीहरु ७२ सालको घटनामा अहिले सम्म पनि झुठ्ठा मुद्दामा कारागारमा हुनुहुन्छ । उहाँहरु निर्दोष साबित गरेर रिहाइ हुनुपर्छ । हाम्रो माग पूरा भए मात्र हामी सरकारमा जान्छौ ।

नयाँ बानेश्वरस्थित संसद भवनमा शपथग्रहणका लागि आएका सांसदहरुले आआफ्नो मौलिकता झल्कने पोसाक लगाएर आएका थिए । 

नागरिक उन्मुक्ति पार्टीका सांसद अरूण चौधरी र गंगा चौधरी पनि थारू पोशाकमा सजिएका थिए । थारु टोपी, कोट र धोतीमा सजिएका गंगाको गोडामा खराउ (काठको चप्पल) थियो ।

संसद् भवनमा रेशम चौधरीकी आमा सुल्फीदेवी पनि आएकी थिइन् । उनले भनिन् , आज श्रीमान् र बुहारी सांसद भएकोमा खुसी छु तर आधा मात्रै । मेरो छोरा जेलबाट बाहिर निस्किए मात्रै पूरै खुसी हुनेछु ।

संसद् भवनमा प्रतिनिधिसभाका ज्येष्ठ सदस्य पशुपतिशमशेर जबराले सांसदहरुलाई शपथ खुवाएका थिए ।