खालि बटोल अस 
कोच्क्याइल गाल 
टुट्लि खट्यक डौँरि अस
चट् चट् टुट भिरल हाँठक नस
नम्ठोर्हि गौहोक छल्रा अस 
गडौरि 
पानी नि पाक डरार फाटल
बर्खैह्या खेट्वाअस पौलि
हुँकाहार
अगहन मैन्हँम 
खेट्वक मेर्वम 
रौवन्या फुुुलल अस कपार
बिन् चप्पलिक ग्वारा
साइट हुँकाहार लुहाकिक हु हिन
फट्लि कट्टु ओ झुुल्वा
साइट जरावर किन्डिह सेक्ना
किउ नि हुहिन
मै सोच्ठुँ अप्नहँ अप्नहँ
टर एकडिन भ्याँट हुइल म
म्वार छावा अम्रिका बा
काठ्मन्डुम घर बा 
काजे कहल हुहि ?
मेै यि बाट सोच्क फे 
स्वाँच नि स्याकल रनहुँ
एकडिन मै हुँकाहार घर गिल म
उ मनैयाँ बगर्व ठे ठर्ह्याइल रलह
ओ कहटलह
म्वार जन्नि महिँ छोर्क गिलि
लाल मोरै लिहे
टभुन म्वार सङ्घर्या नि गिल
म्वार छाई डमन्डोक घर गिल
टभुन उ नि गिल
म्वार छावा पटोइहेक पाछ लागल
अम्रिका गिल
टभुन यि  नि गिल
काजे कि यि  म्वार म्वटु हो
म्वटु जर्मलसे आस सम 
कब्बु म्वार साठ नि छ्वारल हो
मै रुइबेर रुइट यि 
मै हाँसबेर हाँसठ यि
मै सज्ना गाइबेर गाइट यि
मै पानिम भिजबेर भिजठ
मै घाम मुअबेर घाम मुअठ
आस सम कब्बु म्वार सङ 
नि लगम नि कहल हो
काजे कि म्वार जात्तिक जन्नि,
जात्तिक लर्का
यिह हो
यिहि आपनसे ढ्यार  मैयाँ बाटिस 
म्वार
हुइना ट म्वार छल्रा फे 
टेरिकट लुगा आगिम परबेर 
कोच्कोच्याइल अस
कोच्कोच्याइल बा
टभुन
एक सुटा फे खियाइल नि हो
टर उ म्वार लाक खियाइट खियाइट
अख्रिनअस पाट्टिर हो रहल
उ म्वार सङ्घर्या
म्वार म्वटु
महिसे आग
ना जाए कठु 
लाल मोरै लिहे
काजे कि वाकर जस्ट 
महि साठ डिहुइया
वाकर ओत्रैह्यँ ढ्यार
महि मैयाँ करुइया
यि डुन्यँम किउ नि हो
उ बुर्हाइल मनैयाँ
बगर्वम ढरल 
खख्खाइल 
टेँर्ह्वा हँर 
डेखैटि कहटलह ।