बिस बरस बिटल घर अंगना
साँझ बिहान डाईक पाछे पाछे
घरढन्ढा चुल्हा चौका कर्ना
जहाँ बोली, भासा, संस्कार, सिप
सिखल ढकिया बिँरा भंगना
उ अपन अंगना छाईक लग
आझ लैहर हुइल।
आढा जिन्गी जलम घर
छाइक आढा जिन्गी पराइ घर
डुनु ओरिक काम बोली, भासा
संस्कार, सिप सिखट सिखट
छाइक मन कम हाँसल, ढेर रूइल।
जलम घर छोरके पराइ घर 
जिन्गी बिटाई पर्ना सेन्डुरके भर
ठरूवा मरहा कट्हा फट्हा
चाहे,
मद्हा भंगहा लौन्डिया बाज रहे
हिँग उरके डब्बा महकटि रना 
डेखावटी धनी समाज रहे
पठा डेठै एकठो दोराक भरमे
छोरक परठिन छाइन अपन घर
ओहे सत्तर मेरिक बाट कटुईया
रानपरोस के हाँसिक डरमे ।
बचपनमे लरी डाडा भैयनसे
मोर घर मोर डाइ बाबा
ऊ आझ समय संग लैहर हुइल
सखि सहेली गोचा छुट्नै
घर घारी बारी ब्यौंरासे
बचपनके मिठ मैयाँ टुट्नै
छाइक जलम घर लैहर हुइल
अञ्जान घरमे बिना सैहर हुइल
जिन्गी जिएक लग
सक्कु छाइ हुक्रन
ऊ बोक्लार कुहिरा चिर्टी
अपनही हिम्मट करके 
ऊठे पर्ना बा 
नेगें पर्ना बा
जेकर हाँठ पकराके पठैनै डाइ बाबा
ओहे मनियाक राजमे
जिन्गीक फुला फुलैना बा
लावा ठाउँमे सखि सहेली
लावा नाट बनैना बा
बिस बरस बिटाइल 
बचपनके घर भुलैना बा
काहे कि,
ऊ घरसे जिट्टी साँठ निकरल बा
बिडा करे बेर डाइ बाबा
सखि सहेली छाइक पालल् 
जिउ जन्टुके आँस निकरल 
डाइ बाबक् सम्मानके लग
मोह मैयाँ टुरेके
छाइ हुक्रनके जलम घरहे
इ समाज परम्परा बनाके
कैह डेहल लैहर ।
कैह डेहल लैहर ।।

जोशीपुर ५, सिमराना, कैलाली
सम्पर्कः ९८२२६५८७४७, ९८४८५३१५२५
ईमेलः asi.dangaura@gmail.com