सिंहदरबारका लामा-लामा कोठाहरूमा
फाइलमाथि फाइल दबाएर
टेबुलमुनिको 'कमिसन' नपाएसम्म
कलम नचलाउने कर्मचारी, 
अनि लाइसेन्स र पासपोर्टको लाइनमा उभिएर
बिचौलियालाई चोरबाटोबाट नोट हुर्काउने नागरिक;
हामी सबै मिलेर यो व्यवस्थालाई दीर्घरोगी बनाउँदैछौँ ।
राजनीतिको मञ्चमा उभिएर
इमानदारिताको ठूलो भाषण छाट्नेहरू,
भित्रभित्रै स्वास्थ्य, शिक्षा र ठेक्कापट्टाको 
कमिसन डकारिरहेछन्

प्रत्येक चुनावमा
नयाँ नाराको एन्टिबायोटिक बाँडिन्छ यहाँ, 
तर रोग भने झन्-झन् कडा र रेजिस्टेन्ट बन्दैछ ।
अस्पतालमा दाम नपुगेर
भेन्टिलेटर नपाउने गरिब छ, 
मन्त्रालयमा कमिसनको औषधि खरिद गर्न
बजेटको तानातान चलिरहेछ
अदालतका ठेलीहरूमा इन्साफ खोज्दा-खोज्दै
कालो कपाल सेतो भइसक्यो
सरकारी अड्डामा एउटा छाप हान्न
मालिकलाई ढोग्नुपर्ने नियति अझै फेरिएको छैन
हामी सबै यो भ्रष्टाचारको ब्याक्टेरियाबाट ग्रसित छौँ
तर, दोष जति व्यवस्था र कुर्सीलाई मात्र थुपारेर 
हामी चोखो बन्ने नाटक गरिरहेछौँ
कुनै ओभरडोज एन्टिबायोटिकले 
रातारात सुधार्नेवाला छैन यो देश, 
जबसम्म हामी आफैँभित्रको 
'इथिक्स' र 'इमान' पुनर्जीवित हुँदैन ।

दाङ, हालः काठमाडौं