राप्ती करिडोर शिलान्यास भइसकेकाले अब डिपिआरको थप प्रक्रिया अघि बढ्ने बताएका सहरी मन्त्री चौधरीले महदेवाबाट भारतको पचफेडवा बजार जोड्ने बाटो, सिर्सिया नाका खोल्ने लगायतका योजनालाई आफूले प्राथमिकतामा राखेको बताउँदै भने, ‘तपाईंहरु चुनावको तयारीमा लाग्नुस् । केही समस्या भए भन्नुस् । यति बुझ्नुस् कि यस क्षेत्रबाट गठबन्धनको साझा उम्मेदवार मै हुँ ।’ 

उम्मेदवार टुंगो नलागेको योगेन्द्रको भनाइ
उता दाङदेउखुरी क्षेत्र नम्बर १ बाट उम्मेदवारको आंकाक्षी रहेका काँग्रेसका केन्द्रीय सदस्य योगेन्द्र चौधरीले सो क्षेत्रमा गठबन्धनले उम्मेदवार टुंगो नलागेको बताएका छन् । 
योगेन्द्रले शुक्रबार सामाजिक सन्जाल फेसबुकमा भनेका छन्, ‘गठबन्धनले सिट बाँडफाटको टुङ्गो लगाएको छैन, सिटको टुङ्गो लगाउदा स्थानीय निर्वाचनको मतलाई बिर्सनु हुँदैन, होइन भने गठबन्धनबाट पनि चुनाव जिताउन गाह्रो हुन्छ, संगठनमा बिद्रोहको भाब आउन सक्छ, नेता कार्यकर्तामा निराशा हुन सक्छ ।’ 
योगेन्द्रले विहीबार लेखेको स्टाटसमा दाङदेउखुरी क्षेत्र नम्बर १ मा भएको स्थानीय चुनावमा केही हजार मत ल्याउने दलले टिकट पाए गठबन्धनले हार्ने संकेत गरेका थिए । तर सो स्टाटस हटाएका थिए ।
शुक्रबारको सामाजिक सन्जाल फेसबुकमा योगेन्द्रले थप भनेका छन्, सकारात्मक सोचले लेखेको मेरो स्टाटसलाई बङग्याएर मन्त्री मेटमणि चौधरीजीको नामै उल्लेख नगरेको सन्दर्भलाई नामै किटान गरेर उहाँलाई मैले चुनौती दिएको बिषय बनाएँ भन्ने कुरा भ्रमित प्रचार बाजी मात्र हो । उहाँको पार्टीले पनि उहाँ उठ्ने कि नउठ्ने टुङ्गो पनि लगाएको छैन । मैंले कुनै व्यक्ति विशेषको कुरा किन गरुँ, केवल सैद्धान्तिक कुरा मात्र राखेको थिएँ । यसलाई फरक तरिकाले ब्याख्या गरिदिदा दुःख लागेको छ ।