‘बखारि’ भरि भरि अधिकार
अरुलाई नै देऊ सरकार
हामीलाई त ‘डेल्वा’, ‘ढकिया’ 
भरि दिए पुग्छ ।
तर तिमीले त ‘गडौरि’ भरि
एक ‘चिक्टि’ पनि 
अधिकार दिन आनकानी गर्छौ ।
त्यसैले त हामीलाई भन्न कर लाग्छ
जिम्दारहरुले जसरी सताए थारुहरुलाई
ए सरकार, तिमी पनि उही जिम्दारकै 
‘जोंइकाहा’ जस्तो पो देखिन्छौ । 
.....
हिजोका हाम्रा कमैयाहरुले अधिकार माग्ने ?
सिंगै थरुहट प्रदेश माग्ने ?
यस्तै हुंकार गर्दै 
२०७२  भदौ ८ मा जलाइए टीकापुरमा 
थारुका घर, पसल छानी छानी
ठाने होलान् उनीहरु
जलायौ दुश्मनका घर
लौ हेरौ, कसरी पो उठ्छन् थारुहरु ?
तर, तिमीले जलाएको घरको ‘भौगर’
बाँकी छ, अझैसम्म ।
याद राख, 
तिमीले जलाएको घरको ‘भौगर’
‘जिउगर’ हुँदैछ ‘चिटगिन’ बनेर
त्यो ‘चिटगिन’को लपेटामा 
पर्न सक्छ, तिम्रो घर पनि 
किनकि, राखेनौं तिमीले हेक्का 
सिसाको घरमा बस्नेले 
छिमेकीको घरको सिसामा
ढुंगा हान्नु हुँदैन । 
लडाइमा ‘डब्निभिराउ’को 
‘सुरसुरिया’ तिमीले नै फुक्यो 
तर अचम्म, लडाईको मैदानमा
तिमीले पहिले नै टेकिसक्यो ‘ठेहुनि’
‘चिटगिन’को लपेटामा पर्नु अगावै
तिमीलाई भयो भयंकर डर
त्यसैले त छाडीसक्यो घर
तिम्रो घर बनिसक्यो खण्डहर ।
हामीलाई अर्को ‘बुह्रान’ जान गरेको
तिम्रो चक्रब्यूहमा 
अहिले तिमी आफै फसेका छौ ।
हामी त चाहन्छौ अझै पनि 
भाइ भाइ मिलेर बसौ 
तर, शायद तिमी अन्तै बसेर 
थारु उपर बज्रप्रहार गर्न
चाल्दैछौ शकुनी पासा
बुझिसके सबैले तिम्रो भाषा
खबरदार, 
‘केंचुर’ फेर्नेलाई चिनिसक्यो टीकापुरले
अब टीकापुर पटक पटक जल्नेछैन
बरु, अब टीकापुर ‘चहकार’ बल्नेछ
जाज्वल्यमान भएर
आफ्नो गुमेको अधिकार लिएरै छाड्नेछ
बरल टीकापुर
आब, 
बरल टीकापुर ।
बरल टीकापुर ।।
            कीर्तिपुर, काठमाडौं