मोर जवानि हेरागैल बा
डुर डेसके माटिमे 
रकट पस्ना पुहाइट पुहाइट

मोर डाइबाबक
उल्कल बा जवानि
बुर्हिया बर्हके डुम्माहस
लौकर लौकर कर्टि बा अभिन
इहे माटिमे रकट,पस्ना चुहाइट चुहाइट

मोर दरबार आझ
छोट भुँइचालले जोरसे डगमगाइठ
छुनिमुनि बर्हसे फेन 
बस्टि उट्मुटाइठ
सोंचटुँ मोर बरा मकान
कसिक अट्रा कमजोर हुइल
खर्हक भुर्नाहस 
लिरौसि बयाल हरचिज उराडेहठ
जहाँ मोर  पहिचानके नामोनिशान नै हो 
बेगर कामक
घिनाहुन पख्वामे गिरा डेहठ

डाइबाबक बनाइल उ सुघ्घर बस्टि
अभिनटक शिर ठार्ह कैले बा
खेल्टि नाच्टि बा 
अपन सान डेखैटि
बौनि हेरावन, नुकिक साँढ, 
अटा अटा पानी, फग्वा खेल्टि
सखिया, झुमरा, बर्का, मघौटा नाच नच्टि
हरेरि, गुर्हि, अस्टिम्कि, अट्वारि, माघ मनैटि
हरडह्वा, पेन्डिया, सँग छुटाइ, खेरा खैटि
सजनाके रागसँगे गोरु बेर्हटि
जिउगर बा आझ मोर पहिचान
पछ्गुरल अन्ढार लग्ना उ गाउँमे
जहाँ मोर डाइबाबा सुस्कर्टि
अन्तिम सास लेटि बटाँ
मै फेन झकिझकाउ चम्चमैटि सहरमे
अपन पहिचानहे साठ लेटि 
अपन पहिचानहे चम्कैटि
अन्ढार कोन्वामे नै कुर्भुराके
सक्कु जाने डेख्ना फँटवामे 
सयर कैना बा
जहाँ मोर पहिचान भासा संस्कृटि
हँस्टि रहे
नच्टि रहे
सडा जवान रहे
जुग जुगसम बच्टि रहे ।

गढवा–२, महदेवा, देउखर