आझ फे भुवर बिहानम 
म्वार बाबा निक्रठ पोकल्लि भात खैटि
जुवामा भैंस जुट्याक जिम्डर्वक खेट्वा ज्वाट
कमैया नि हुइट बाबा जिम्डर्वक घर 
तर कामदार बनल बाट
ना ट शोषित हुइट जिम्दर्वसे, ना ट स्वतन्त्र फे
खोल्ह्वा नाङ्घ सजिल बनल बाटिन बाबाहँ
तर जिन्दगिक खोल्ह्वा नाङ्घ सजिल कहाँ बाटिन ?
पक्कि डगरम नेङ्ना सजिल बाटिन्
तर जिन्दगिक डगरम नेङ्ना सजिल कहाँ बाटिन्
सक्कुजे कठ गाउँम परिवर्तन आइल बा
का जात्तिक परिवर्तन आइल ट गाउँम ?

हुना ट बाबा उह हुइट आझ फे बा...बा
तर आझकल बाबा ‘ड्याड’ बनल बाट
हुना ट मन्डरा उह मेरिक हो आझ फे
तर ब्वालबाजि मन्डरम 
भ्वाङ् परल असक लागट
गिटबाँस उह मेरिक ट हुइट आझकाल फे
तर गितम मै जिन्गिक स्वाद नि पैठु
आझ कहाँ बा हमार सजना, मैना
कहाँ बा चलन ढुम्रु गैना
पहर्ना ट पहर्ल आझुक लर्कावन् 
तर का पहर्ल ?

आझकल बरा बरा घर बनल बाटन् गाउँम
तर घरम बैठना मनैय नि हुइट
डाइ डिन गन्टि बैस्ठि पिखाँहिम
छावाक अस्रा लाक्खन
थाह नि हो 
छावा बक्सम खुसि लेक अइठा कि
अप्नहँ बक्सम अइठा ?
सक्कुजे कठ गाउँम परिवर्तन आइल बा
का जात्तिक परिवर्तन आईल ट गाउँम ?

बर्दिया –१, खोदाऊ
हालः पोखरा
सम्पर्कः ९८२२४७७१३४