बाबा,
टुँँ नै बोल्ठो ढ्यार,
तर टुँहार गुम्मरपन म,
म्वार भविष्य नुकल बा
टुँहार आँक्खर हाँठम,
म्वार जिन्गिके सुरक्षा बा
टुँहार आँखिम, 
नै बोल्लक हजार सपना बा
टुँ दुःख अप्नेह ढर्लो,
महिन मुस्कान डेक
टुँ डट्करके फे कब्बु नै बिसैलो,
का कर कि म्वार अइना काल्ह 
टुँहार आझसे बहुट बरुवार रह
मै न्याँग बेर गिरजैठुँ, 
तर उठ्ना आँट अप्नेसे सिख्ल बाटुँ
मैं अप्नेक जस्ट बन ट नै सेकम
तर अप्नेक ईमान, धैर्य ओ सहास
म्वार रगतम डौर्टि बा
मै नेँग्टि बाँटु
मनै कठ–
‘बाबाक जस्ट छावा’
हुँकिन का पटा
एम्न एक्ठो जिन्गिके त्याग
और जिन्गिके आस
अट्रा गहिंरक नुकल बा
हुँकिन का पटा
म्वार नेङ्ना आँट,
अप्नेक अधुरा जिन्गिसे अइलक हो
मै कब्बु कमजोर डेखैम कलसे बाबा,
महि माफ कर्डेहो,
का कर कि बल्गर हुइना कलक,
अप्नक जस्ट चुपचाप सहना हो। 

बारबर्दिया नगरपालिका, बर्दिया
हालः कीर्तिपुर, काठमाडौं
सम्पर्कः ९८५७८७९९९९