गाउँक पुरुव डहरचन्डि ग्याँरम
जबसे मै जन्ना हुईनु टबसे 
हमार बाजे कहैं जबसे देखनु मै फे टबसे 
चारवर डाहाँका फैलईल अर्गराईल बा 
हमार गाउँक ठनुवा सेमरा ।।

कति मेर मेरिक चिरैयनके ट काेटाल रह 
काैवा मैनीक चिरबिर चिरबिर कुईलरियक कुहु कुहुले 
चैनार रह  सारा  ग्याँरा बरा जाेर
साहम  घारक घार मधरिनके बन बसेरा 
हमार गाउँक ठनुवा सेमरा ।।

फाँडम गेहदुल ट बाझैं बाझैं
मैनी काैवनके बच्चा त काेटालमसे कार्हि
मधरिन ट माघम थ्वाँच थ्वाँच ढेला मारि
टर टर  सहट चुह चटाकसे चाटि आब ट सुनसान
हमार गाउँक ठनुवा सेमरा ।।

हर साल गाउँक पुजा पाठ दुल्हनके भाेजाहा 
दिया बाटि छाँकि बुँदा ढर्कावा पाई
गाउँ राेगब्याधी किराकाँटि भूत प्रेतनसे 
 निक निक रुखुईया दिउँटक थान 
हमार गाउँक ठनुवा सेमरा ।

हुईट ठुठ्ठा  फेन लउटट मने रुखुवा जिँउ का टिउँ 
चैत्या  ध्वाँटले डेखनउस  ढकर मकर बर चुम्मर
बैशखिया गएरुवा बेराहा अखाेरिएनके सिटरैना कमदा
घामक छ्याँका टिउगरिएम लागल छटरि बनट
हमार गाउँक ठनुवा सेमरा ।।

गाउँक पुरुव डहरचन्डि ग्याँरम
जबसे मै जन्ना  हुईनु टबसे 
हमार बाजे कहैं जबसे डेखनु मै फे टबसे  
अस्ट चारवर डाहाँका  फैलईल अर्गराईल बा 
हमार गाउँक ठनुवा सेमरा ।।

राजापुर–२, जोतपुर, बर्दिया