आइल फे थारूनके बर्का टिउहार माघी
घर घरम चारूवर, खुशीयाके डिया डागी

छोक्रा, मघौटा नाच नच्ठी, सुरिक सिकार खैठी
स्नेहके चाड हमार, संस्कृति बचइनाम लागी

पहिल कमैया, कम्लहरी बन्क, सोसन म परली
आब ट आँखी खुल गिल, जुर्मुराक हम्रे जागी

थारूनके    मुद्दा   उठाक,  आन्दोलन  मचैठी
थारू   पहिचान,  थारू  हक, संविधान म  मागी

टीकापुरके घट्ना म,  झुट्टा मुद्दाम परली
रेशम  लगायत  सक्कु जान, जेलमसे भागी

तराईक भूमि पुत्र हुइ, नै छोरब इ जन्मभूमि 
कोइ नै लगाइ पाइ आब थारून्के घरम आगी

थारू भासा साहित्य, आब ह पोस्टा म छापी
नै हेराइ पहिचान, जातियताके गुड्री टागी ।

कैलारी गाउँपालिका–५ कैलाली, छुट्की पलिया
हालः रानीवन, काठमाडौँ