म्वार जिउ भिट्रक

म्वटु, कर्जा, फोक्सा सक्कु चुम्मर बा

हाँठ, ग्वारा सक्कु चुम्मर बा

व सैडिठ्ठ जिउ चुम्मर बा

टभुन म्वार जरम चुम्मर नि लागठ्

काजेकि

म्वार जर्मक इन्जिन बिग्रल बा

उहमार

म्वार जरम चुम्मर नि लागठ ।

म्वार जर्मक इन्जिन

सडिमान बरघरान अङ्ना सम्झठ

जोन अङ्नम नाँचट बर्का नाच

जोन अङ्नम नाँचट छोक्रा नाच

बरघरान अङ्ना

जहाँ ह्वाए न्याय निसाफ

जहाँ ह्वाए हिट्वक उड्डार

म्वार जर्मक इन्जिन

सडिमान बरघरान बह्रि सम्झठ

जहाँ टिकँट अस्टिम्कि

म्वार आङ्गमसे बहलक उ जह्रि

म्वार आङ्गमसे बहलक उ खौरौह्वा

जहाँमारट मछ्छि बघौरा,

चिठौर व लम्कोल्हिक मछ्वार मनै

किउ ख्याल सिकारिक ला हँक्वा

जब्ब लिप्टिन बर्खा

टब्ब सुरु हुइन गाउँ मनैन्हक मुन चिर्ना

किउ काट भिर बनकस व पुँन्जा

किउ जुन्हुँ सज्ना गैटि खेट्वा पनाए

किउ डस्यम बर्किमार गाए

किउ माघम ढुम्रु गाए

जब्से मै बघौरासे

जब्से म्वार लग्गक सङ्घारि

चिठौरा व लम्कोल्हिसे

सज्ना, मैना डुस कैगिल

अट्वारि, अस्टिम्कि डुस कैगिल

व कैगिल बर्किमार व ढुम्रु डुस

टब्से म्वार जरम चुम्मर नि लागठ

म्वार आङ्गमसे बहना जह्रि व खौरौह्वक

मछ्छरगिढ्ढि थारुनसे

भ्याँटक सिन्हि बाटन

पुँन्जा कट्ना जन्नि,

मुन चिर्ना जन्निनके गाइल

मैना सुन्ना सिन्हि बा

आस्काल खाभर किउ नि लगाइट

हँक्वा किउ नि ख्यालट

खर व बन्कस कट्ना

थारु फे नि डेख्पर्ठ

काजेकि

आसकाल सरकार महिँ

(बघौरा), चिठौरा व लम्कोल्हि गाउँ ह

उक्ठाक निकुञ्ज बनाइल बा

यिहाँसे छारा कैक गिलक मनै

बन्खेट्वा गाउँ म रहट सम

आपन मनै लग्ग रहल असक लाग

आस्काल उ गाउँ ह फे

सरकार उक्ठा स्याकल

सरकारके कना बाटिस,

‘बन्वाँ व जनावर बचाइक ला

गाउँ उक्ठिलक हो’

बघ्वा आक गाउँ उक्ठाइ लागल

यि भर सरकार खै कैह्या ड्याखि ?

बर्दिया