१. बिना सेवा कर्ले सम्मान खोजके कहाँ पैबो ?
बिना पहर्ले–कहर्ले ग्यान खोजके कहाँ पैबो ?
संसार डेखुइया डाइ–बाबा घरहिं मे बटै –
टुँ मन्डिलमे भगवान् खोजके कहाँ पैबो ?
          

 २. टुहिन अपन हाँठगोर चलैहि परि आब,
      उ डासटाके जन्जिरहे टुटैहि परि आब,
       यडि चहठो टे अपन हक और पहिचान–
        उठो, सामन्टि डेवाल ढलैहि परि आब ।

३. मै खोजटुँ माटिम हमार पहिचान कहाँ गिल ?
जनयुद्धमे झुक्मुकैना उ बिहान कहाँ गिल ?
सरकार मोर सवालके जवाफ चाहल महिन –
हमार डाडुभैयन्के कैल बलिडान कहाँ गिल ?
        

४. मठ–मन्डिल मै बनैठुँ टुँ पूजा रोज कर्ठो,
        ढोल–डमैया मै बजैठुँ टब टुँ भोज कर्ठो,
        मनै होके मनैनहे टुँ काहे अछूट कठो ?
        अरे पस्ना मै चुहैठुँ टब टुँ मोज कर्ठो ।

५. कुर्सिक् लग किल लरके डेस नै बनि ।
विडेसिन्के भरमे परके डेस नै बनि ।
सुनि नेटाजि, आइ हाँठमे हाँठ मिलाइ–
अपन लग किल मरके डेस नै बनि ।
        

६. गुह–मुट सोहोरके बर्हैलि हमार डाइ 
        जिम्डरुक घर कमाके पर्हैलि हमार डाइ 
        भगवान् कना ओहे हुइटि डुनियाँ डेखैलि,
        अपने उठे नैसेक्के ठर्हौलि हमार डाइ ।

७. बुद्धके लर्का हम्रे अप्नेमे लरके नै हुइ ।
बहाडुर नेपालि हम्रे पाछे परके नै हुइ ।
अपन डेसके झन्डा लेले विडेसिन आघे बर्हटै,
सगरमाथम् बैठुइया हम्रे टरे झरके नै हुइ ।
        

८. जिम्डरुवक् कमैयाँ लागके पल्लैं हमार बाबा 
        राट भरभर भुँखे जागके पल्लैं हमार बाबा 
        डिउँटा हुँइटै हमार बाबा जिए हम्रहिन सिखैलैं,
        बजार मनिक् बोरि टागके पल्लैं हमार बाबा ।

९. साँझ बिहान भुँख्ले पेट मँजुरि कर्ठै जनटा यहाँ
जट्रा कर्ठैं टबु फेंन भुखाहिम् पर्ठै जनटा यहाँ
सरकार हँकुइयन् विडेस घुम्ठैं उपचारके निहुँमे–
हेग्नि लग्लेसे जिवनजल नैपाके मर्ठै जनटा यहाँ ।
        

१०. मर मर काम कर्ठै जनटन्के हाँठम् फोक्टा बटिन् 
        मास भर नेटा खैलैं जनटन्के बख्रम् चोक्टा बटिन् 
        कब आइ सान्टि कठैं संविधानके बटिया हेर्टि रोइटैं,
        लावा लुग्गा नेटा घल्लैं जनटन्के फाटल पोक्टा बटिन् ।
      

 –कैलारी गाउँपालिका–१ मनाउ, कैलाली, हालः धनगढी

दहितके थारु भासामे झिर्खि मुक्तक संग्रह प्रकासिट बटिन् ।

साभारः लावा डग्गर त्रैमासिक, २०७३, बरस ७, अंक ३, पुर्नांक २७