इ अन्धर्या रातक 
फट्कार‌ बड्रिम
सारा‌ निडाइल टाेंरैयन‌ जागट‌
ट टुँ सट्द 
जागल रना,
आपन चहकार‌‌ ओज्रारसे
सक्कुहुनक भुँख मेटाई सेक्ना
थारु टुँ 
उठाे जागाे काजे निडाइटाे ‌?‌
इ प्रकृतिके‌ 
इमान्दार‌ रगत टुँ,
न लाेभ, ना‍ लालज‌
आपन‌ इमान्दारिताके रगत 
इ ड्यासक‌ खुसिक लाग‌ कुर्वान कर्लाे 
टुँहार रगतके माेल
इ जगतके सबसे चहकार हिरा 
आपन चहकार ओज्रारसे 
इ राज्यक ढुकुटि भर सेक्ना 
थारु टुँ 
उठाे जागाे, काजे निडाइटाे ?‌
न वेद पहर्लाे, ना पुरान पहर्लाे
आपन गाउँ समाजके आनबान पहर्लाे 
न रिति पहर्लाे, न निति पहर्लाे 
हजाराैँ अंख्रा ज्ञान मुहम ढर्लो 
न साम्यवाद पहर्लाे, न समाजवाद पहर्लाे 
टभुन्‌ कट्रा सहजसे व्यवहारमा उटर्लो,
उ किटाबक पन्ना‌ नै हुइटाे टुँ 
व्यवहारिक ज्ञानके‌ ज्योति हुईटाे 
आपन चहकार ओज्रारसे 
सक्कुहुन् डगर डेखाइ सेक्ना
थारु टुँ‌
उठाे जागाे, काजे निडाइटाे ?
टुँ एक्क मन्द्रक त्रासनसे 
सारा स्वत्रा भगैठाे
ट कसिक‌ यी ड्यासक‌ 
उपनिवेशकन भगाई नि सेक्बाे  ?
टुँ आपन वाणीक किल्लासे 
सारा ड्यास बहन्ठाे
ट कसिक इ ड्यासक भ्रस्टन बान्ह नि‌ सेक्बाे ?
टुँ आपन मधुर रसगर गितसे 
सारा जगत मैयाँ जगैठाे
ट कसिक‌ इ ड्यास हँ खुसि बनाई नि सेक्बाे‌ ? 
टुँ‌‍ इ पिरथ्यामे जकर-मकर चम्कना बेगर्ह्या हुइटाे 
आपन चहकार ओज्रारसे 
एक्क घरिम सारा ड्यास हँ बनाई सेक्ना 
थारु टुँ
उठाे जागाे, काजे निडाइटाे ? 

                        बर्दिया