डढेलो लागेपछि
आगो सल्केपछि
फलाम बल्दैन
फलाम जल्दैन
पत्थर खरानी बन्दैन ।
आगो बाल्ने बेला, पराल बल्छ
आगो दन्किएपछि, दाउरा खरानी बन्छ
कि टीकापुरलाई फलाम बन्नु पर्थ्यो
कि टीकापुरलाई पत्थर बन्नु पर्थ्यो
कि जलेर खरानी बन्नुपर्थ्यो ।
त्यसैले,
टीकापुरलाई जल्नै पर्थ्यो
टीकापुरलाई खरानी बन्नै पर्थ्यो । 
टीकापुर दन्कियो
टीकापुर बल्यो
टीकापुर जल्यो 
टीकापुर खरानी बन्यो
कतिको इज्जत लुट्यो
कतिको घरबार ।
गरिबको घरबार लुट्नलाई
थारु चेलीहरुको इज्जत लुट्नलाई
र राज्यलाई तुष्टि दिनलाई भएपनि
त्यसैले ,
टीकापुरलाई जल्नै पर्थ्यो
टीकापुरलाई खरानी बन्नै पर्थ्यो ।
टीकापुर जलेपछिको
अर्को पाटो पनि छ
धेरैले घर बनाए
शहरमा महल ठड्याए
घर र महल बनाउनको लागि 
कसैले कसैको आशा बेच्यो
कसैले कसैको आँशु बेच्यो
कसैले खरानी बेच्यो
केही मान्छेको घर बन्नलाई 
केही मान्छेको महल ठडिनलाई 
त्यसैले,
टीकापुरलाई जल्नै पर्थ्यो
टीकापुरलाई खरानी बन्नै पर्थ्यो
डढेलो लागेको माटोमा
रुख पनि उम्रिन सक्छ
फुट्की च्याउ पनि उम्रिन सक्छ
टीकापुरमा रुख उम्रिन पर्थ्यो
तर उहाँ फुट्की च्याउ उम्रियो
फुट्की ढक्यामा राखेर
फुट्कीको ब्यापार गर्न काठमाडौं पस्यो
कोही सांसद घरमा छिर्यो
कोही  सिंहदरबार भित्र छिर्यो
तिनीहरुलाई सांसद भवन छिराउनलाई
तिनीहरुलाई सिंहदरबारको स्वाद चखाउनलाई
त्यसैले ,
टीकापुरलाई जल्नै पर्थ्यो
टीकापुरलाई खरानी बन्नै पर्थ्यो ।
फुट्कीको कहानी उदेकलाग्दो छ
भन्नेलाई भन्दा सुन्नेलाई लाज लाग्दो
टीकापुरमा मिलेर फुट्की टिप्नेहरु
काठमाडौं पुगेपछि खोसाखोस गर्न थालेपछि
मेरी ‘आजी’ले बनाउनु भएको ढक्या च्यातियो
आजभोलि ‘डाइ’ यो कुरा सुनेपछि 
ढक्या न दे छोरा भनेको थिएँ भन्नुहुन्छ 
फुट्कीको एउटा कहानी लेख्नको लागि 
मेरी आजीको कहानी लेख्नको लागि 
त्यसैले,
टीकापुरलाई जल्नै पर्थ्यो
टीकापुरलाई खरानी बन्नै पर्थ्यो ।
टीकापुर जलेको खरानीमा
आजभोलि 
फुट्की निस्किन छोडेको छ
फुट्कीलाई आफ्नो बाबुको बिर्ता ठान्नेहरुले पनि
ढक्या टाउकोमा राखेर टीकापुर जान छाडेका छन् ।
तिनीहरुलाई फुट्कीको मालिक बनाउन 
तिनीहरुलाई ढक्याको मालिक बनाउन 
त्यसैले,
टीकापुरलाई जल्नै पर्थ्यो
टीकापुरलाई खरानी बन्नै पर्थ्यो ।