बटास्या दश कक्षासम् पह्रल् बा । पह्र ब्याला उहिँका सब्से महान लग्ना शब्द कलक डाई रहिस् । हरेक कापी ह्वाए या पन्ना डाई लिख्ल रह । आठ कक्षा पह्र ब्याला डाई शिर्षकम निबन्ध लिख पर्ना रहिन् । ऊ डाई शिर्षकम निबन्ध लिख्क फस्ट मर्ल रह । टबसे ट झन् डाई भगवान, डाई सृष्टि, डाई संसार.....या कहि डाई जो सबकुछ । हरब्याला डाईक महानता गाए ।

भ्वाज करल् डु बरस पाछ रसरस डाई लिखल् पन्ना ढुह््यैटि गइल् । ऊ पन्ना पुराका पुरा मक्का गैल् । ड्वासर पन्नम झरझरसे लिख्ल रह– “म्वार जन्नी” । ऊ आपन जन्नीहँ बहुट मैया करठ् । आपन जन्नीक हर मागन पुरा करठ् ऊ, चहा पहार बिल्टाई पर । ठर्वक कन्ढा सम् बाटिस् वाकर जन्नी । टर जन्नीक आघ पुँछि हिलाइठ् बटास्या ।

माऊ, जेठिन्या, सरजिया, साली, साला.....हाँ अस्टहँ नाटनट्कुर पलि रठिस् वाकर घर । मिठमाठ पक्लसे सब्से पैल्ह वाकर सस्रार पुग पर्ठिस् । यदि निपुगल् कलसे बटास्यक जन्नी खटोलपाट शुरु । बटास्य फे बान पर्सेक्लिस् । लरौ साह्रे बार बजे राट्क साली फोन कर्लिस्,

“दिदी, डाईक प्याट बठाईटिस् । भाटुहँ बिर्वा लेक पठाड्या ।”

बटास्या हडर बडर पाइन्ट लगाक निकर्जाइठ् मेडिकलम बिर्वा लिह । बिर्वा डिह ड्वासर गाउँ पुग्जाइठ् । बटास्या जब घर पुगठ् ट राटिक डुई बजल् रहठ् । माघ ठिक हुइलक खबर सुनाइठ् । जन्नी एक चुम्मा डेठिस् । बटास्या बरा गहिँर निंड सुटठ् ।

ड्वासर राट वाकर डाइक दाँत बठाक जुरी आइ भिरल् रठिस् । दाँत आब चुपाई टब चुपाई कैक पिरा सहक बैठल् रठी । टर दस बजठ् बजठ् सह निसेक्ना होजैठिन् । बठ्ठक झार जुरी आजैठिन् । मन्का हनहनाई लग्ठी ।

हनहनाइठ् सुन्क ठर्वा मेढर्वन अन्कुस् लग्ठिन् । बटास्या बल्खिच कच्वाटहस् पुछठ्, –“का हुइटा डाई ट्वार ?”

डाई ब्वाल पैल निरठि, टर्नी खपाकसे कचोट्ठी ।

“हिंकार जब फे अस्ट हुइटिन् । बठैहिन् चुपा रहहिन् ।”

डाई– “निसेक्नाहस् लागटा छावा । बिर्वा लान्डेट्या ट ।” डाई बिन्ति कर्ठी ।

“अट्रा राट ट कहाँ जैहिँ ना । चिमचाम सुट रना हो । ना सुटहि ना सुट डिहीं । सिकार उकार ना खैहो ट कठुँ, आँखर आँखर चबैटि रठो । दाँत निबठाई ट का बठाई । चिमचाम सुटो । अट्रा राट कहाँ जैबो । मेडिकलक मनै फे ट निजग्ठ अट्रा जुन ।”

जन्नी अट्रा कठिस् ट बटास्या फेर ओंडर जाइठ् पठ्रिम ।