बर्टनक आवाज बरे राटसम् आइटह
भन्सक बम्मा चल्टि बा,
डाइ भन्सम बाटि ।
टिन्यो पटोइह्यन आपन आपन कोन्टिम सुट जा चुक्ल,
डाइ भन्सम बाटि ।
डाइक काम बाँकि रहिन, मुले काम सब्के रहिन,
मने डाइ आभिन फे सक्कु काम आपन मन्ठि ।
दूध ढिका क,
जुराक,
जवाइन डर्ना बा,
टाकि बिहन्य छावन ताजा दहि मिलिन,
चुल्हम ढरल् भाँरा डाइ किचोठर्ठि
चहा दिन बदलजाए, चुल्हा साफ हुइक चाहि ।
बर्तनक आवाजसे
छावा–पटोइह्यक निंड खराब हुइटिन्,
बर्का पटोइह्या बर्का छावासे कठि,
“टुहाँर डाइहँ निंड निअइठिन् का ? 
ना अप्न सुट्ठी ना हमन सुट डेठी”
मन्हलि मन्ह्लसे कठि,
“आब हेरहो बिहन्य चार बजेसे खनमन सुरु हो जाइ, 
टुहाँर डाइहँ चैन नि हुइटिन का ?”
छोट्कि छोट्कक् ठे कठि,
“प्लिज जाक यि ढोंग बन्द कराउ 
कि राटक चुल्हा खालि रहक चाहि”
डाइ टबटक वर्टन मिस स्याकल् रठि,
लिउह्रल पुट्ठा,
आँखर उन्ज्रा,
लट्कल छाला,
जारम साँसट,
आँखिम पाकल मोति बिन्दु,
माथम टप्कल पस्ना,
ग्वारम उमेरक लग्लगाहट्,
मुले,
दूधक गरम कराहि
उ आभिन फे छुछ्छे हाँठले उठा लेठि,
टबो पर
हुँकाहार अंग्रि निजर्ठिन्,
का कर कि उ डाइ हुइटि ।
दूध जुर हो चुकल,
जवाइन फे लाग स्याकल,
घरिक सुइ मिच्छा स्याकल,
मने...
डाइ फ्रिजमसे डुल्रि निकार्क काट लग्ठि,
हुकहिन निंड नि लग्ठिन्,
काकर कि उ डाइ हुइटि ।
कबु कबु सोंच्ठु कि डाइ जसिन विषयम 
लिख्ना, बोल्ना, बटैना, जटैना कानूनसे बन्द हुइक चाहि,
का कर कि यि विषय निर्विवाद हो,
का कर कि यि सम्बन्ध स्वयं परिक्षा हा ।
राटक बार बजे बिहानिक लाग डुल्रि कट्गैल्,
अचानक याद अइलिन कि बिरुवा ट खैले नि हुइ,
बित्टारक सिह्रनिक टर ढर्लक ठैलि निकर्लि
जोन्ह्यक ओजरारम
बिरुवक् रंगक हिसाबसे मुहम डर्लि ओ घटक्क पानी पि लेलि ।
पन्ज्र एक निंड पुगा सेक्लक बाबा कल, “आ गैल्या”
“हाँ, आज ट कौनो काम नि रह”
–डाइ जवाफ डेलि
ओ
ओंडर गैलि, काल्हिक चिन्टम
पटा नै निंड अइठिन् कि नाइ
मने बिहन्य कौनो मिच्छावन नि रठिन्
का कर कि उ डाइ हुइटि
बिहन्यक घन्टि पाछ बाजठ्,
डाइक निंड पहिलहँ खुल्जैठिन्,
पटा नि हुइटिन कि कबु कबु जारम फे,
डाइ ढिकाइल पानीले लहाइल् हुइहि
हुकिन सर्डि नि लग्ठिन्,
का कर कि उ डाई हुइटि ।
पत्रिका पहर्बे नि कर्ठि मने उठाक लन्ठि,
चाइ नि पिठि, मने बनाक लन्ठि,
हालहाल खान नि खैठि मने बना डेठि
का कर कि उ डाइ हुइटि
डाइक बारेम बाट जिन्गि भर नि ओराइ
आउर हाँ, यदि पहर्टि पहर्टि 
आँखिमसे आँस आ जाइ ट कृपया खुल्क रुइबि
ओ आँस पोंछ्क एकचो आपन डाइहँ जादुक उँक्वार जरुर डेबि,
का कर कि उ और केक्रो नाइइ, अप्नक्क डाई हुइछि ।

कौशल के मिश्र से लिखल हिन्दी भासाके कविता थारुम सोम डेमनडौरासे उल्ठा हुइलक हो ।