असारके  महिना रठा । गाउँक्  किसान् हुक्र हर्डी, घुइया, पिप्पर लगाक व कोक्नी बोक सेक्ल रठ । आब ढुर्या जोट्ना म  ब्यस्त रठ । किसान आपन पस्ना बगैटि खुसी हुइना ब्याला यह हो । तर इ समय म सक्कु ज दुःखी रठ । का कर कि इ समय म भगन्वा एक बुँदा पानी नि डेक सक्कु खेट्वा सुख्खा बना डेल रठ। 

गाउँक् सक्कु किसान हुक्र झोपडी म कलुवा, मिन्ही खाइबेर असिन घम्राही म का धान  बुइलसे मजा हुइ कना किसानके बिच म छलफल हुए  व  सक्कु किसानके  मुहम्से वह बाट निक्र क, अँसौ का खाब कना व  खेतीपाती कसिक करब कना चिन्ता । आकासे खेती म भर परल किसान हुकन खेती कर्ना बडा समस्या रठिन् ।

सक्कु किसानके अनुरोध वह रलहिन् कि बर्सो भगवान् । ऊ गाउँक् थारुन् माघा लोट्ल।जन्यावन  तीन चार चो गैया ब्यार्ह फे गैल । सजना गाक पानी मँग्ल  । टब फे पानी नि गिरल् । 

एक दिन बाबा व मै धुर्या ज्वाट गैलि । बाबा हर जोट्टि हर रोक्क बाउँ हाँठ लिल्लाह्री म ढर्टी घाम छेक्टी कल, अर छावा असिन् घम्राही कर्ठा अँसौक साल् जाटिक बर्खा नि हो का ?

काजन् ट का बाबा । ऊ ट भगन्वा जानी  । पाछ वाछ पानी परी काहुँ । कौनो साल बर्खा पाछ रठा, मै कठुँ । 

फेन बाबा कठ, अर कहिया पानी परि ? भडौँ महिना पर लागल् ।
बर्खा नि रहि ट बाबा हम्र  का खैबी ? मैं कलु।  

वह ट समस्यक् बाट बा छावा । बर्का डिहुवम कोक्नी बुइली जम्बे नि करल ।  औरवर जुन घामक् मार कुल्मुलाइ्टा । मार, डर्यावर्या भात खाक गुजारा कर्बी काहुँ छावा, बाबा कठ। 

मै फेन बाबा हँ प्रश्न कर्ठु, उल्टा हर, उल्टा छट्री पर्लसे कसिन हुइने रह ? हमार समस्या बुझ्क पानी डेट कि भगनवा हाँ बाबा ।

पानीक ला गाउँक् मनै का नि कर्लि, सक्कु डेउटावन् मना सेक्ली । गैया बेहर्ना, माघा लोट्ना फेन सक्कु काम कर्सेक्ली छावा । पानी नि पर्ना म ट का कर्ना हो ट, भगन्वा रिसाइल जो जान परल ।