मैं इ देशके धर्तीपुत्र
१० दिन अगाडि
|
१० जेठ २०८३
तस्विरः कुलदीप न्यौपाने
इन्द्र चौधरी
जब जब देश परिवर्तन खोजठ
टब टब मोर खोजी हुइठ
लेकिन,
परिवर्तन पाछे शासकसे
जब मैँ आपन अधिकार मङ्ठुँ
टब ऊ कहठ, “टैँ के हुइस् ?”
प्रश्न सुन्के मनमने कठुँ
“राणा शासनविरुद्ध लरुइया मोर पुर्खन बिस्रा डर्लो ?
प्रजातन्त्रके लाग लरुइया मोर बुडी बुबन बिस्रा डर्लो ?
अन्याय विरुद्ध लरुइया मोर डाइबाबन बिस्रा डर्लो ?
लोकतन्त्रके लाग लरुइया मोर डिडी डाडुन बिस्रा डर्लो ?
सुशासनके लग लरुइया मोर जेन्जी भैयाबाबुन बिस्रा डर्लो ?
राट डिन सिमाके अख्वारी करुइया हमन बिस्रा डर्लो ?”
राज्यके आश्वासनसे
फाटल जिन्दगी चब्डना सपना डेखुइया मैँ
हर जुगमे अपन परिचय डेटी आइल मैँ
आउर कसिक चिन्हाउँ ?
“मै ट सख्या, मघौटा, मुङ्ग्रहौवा नाच नच्ठुँ
मागर, ढुम्रू, सज्ना, मैना गीत गैठुँ
भेग्वा, चोल्या, लेहेङ्गा, गोन्या पहिरन घल्ठुँ
मन्ड्रा, कस्टार, मन्जिरा, पिल्रु , बस्या बाजा बजैठुँ
अस्टिम्की, अट्वारी, डस्या, डेवारी, माघ टिउह्वार मन्ठुँ,
ढिक्री, घोङ्घी, मच्छी, खेर्या परिकार खैठुँ,
बरघर, गुर्वा हुँकन् गाउँ चलुइया ओ सम्रुइह्या अग्वा मन्ठुँ ।”
आकुर जन्ना मन बा कलेसे
“सक्कु दलके घोसनापत्र हेरो,
जनगणनाके तथ्यांक हेरो,
संविधान धारा उपधारा हेरो,
मै केवल,
सत्ता परिवर्तनके लाग लरुइया सिपाही किल नि हु ?
“मैं ट यी देशके आदिवासी हुइटुँ
जनजाति हुइटुँ
रक्षक हुइटुँ
सबके पेट भरुइया किसान हुइटुँ
मैँ ट यहाँके धर्तीपुत्र थारू हुइटुँ
धर्तीपुत्र थारू हुइटुँ।”
सम्पर्कः ९८४८४९६९८१
स्थायी ठेगानाः शुक्लाफाँटा नपा–१२, कञ्चनपुर
हालः कीर्तिपुर नपा– ९, काठमाडौ
